Perspectiva Independiente without background 001

Rene Herdé (AVP): MEP a rechasa e mocion-den-concepto cu tur tres fraccion a yega na dje

Herde03“Diahuebs merdia tabata tin un mocion-den-concepto entre e tres partidonan den Parlamento pa expresa sosten na Sint Maarten tocante di e “KB” cu Gobernador di Sint Maarten a haya relaciona cu nombramento di ministernan pa e pais aki. E mocion a ensera un referencia na e raport Biesheuvel cu a conclui cu nombramento di ministernan ta un asunto di e paisnan autonomo. E mocion-den-concepto aki a wordo rechasa pa e fraccion di MEP.” Asina e lider di e fraccion di AVP, Rene Herdé a bisa den e conferencia di prensa di diamars mainta. Esaki ta nifica cu e fraccion di MEP a rechasa loke nan miembro a yega aña dje den consulta cu PDR y AVP. Den luga di e mocion-den-concepto aki, fraccion di MEP mes a bin cu un mocion nobo. E mocion aki tambe lo a haya e sosten di e fraccion di AVP. Pero MEP nunca a presenta e mocion nobo aki. Diabierna merdia ora e reunion a sigui, e fraccionnan di MEP y PDR hunto no a presenta pa e reunion. Rene Herdé: “Nos a bisa MEP cu nos lo sostene nan mocion, cu tabata un mocion sin mucho contenido. Pero cu e fraccion di AVP tambe lo presenta un mocion cu si ta referi na e raport Biesheuvel, pasobra e conclusionnan di e raport aki ta di sumo importancia den e caso di Sint Maarten. MEP no lo a sostene e mocion di AVP y pa e motibo aki ni MEP ni PDR a presenta pa e reunion diabierna. Nan a tuma liber den ora di trabou.

ACTUA SEGUN LEY
Segun ley, casosnan igual ta wordo trata igual. Den e caso di Glenbert Croes y den e caso di Sint Maarten ta trata di si gobierno y gobernador di e isla mes tin e autoridad pa nombra ministernan pa e pais y si gobierno di Reino tin algo di bisa den esey. E raport Biesheuvel ta masha cla den esey. E raport ta conclui cu nombramento di ministernan ta un asunto di e paisnan autonomo. Hasta si tin duda riba integridad di e personanan cu lo wordo nombra, gobierno di Reino mester actua cu masha cautela y reserva, pasobra ta trata di un asunto autonomo di e paisnan. Fraccion di AVP a tuma e mes un posicion den caso di Sint Maarten, cu a tuma den caso di Glelbert Croes, apesar di e preguntanan di integridad cu gobierno di Reino tabata tin den tur dos caso. Esta cu nombramento di ministernan bou tur condicion ta un asunto di e paisnan autonomo.

Fraccion di AVP ta mustra cu atrobe e partidonan MEP y PDR no kier para pa defende e autonomia di nos pais y awor tampoco kier a para pa sostene e autonomia di Sint Maarten. Rene Herdé: “Mescos cu nos no kier pa niun hende mete den nos asuntonan interno, nos tampoco ta mete den asunto di otronan. Loke si nos ta haci ta percura pa ni den caso di Aruba, ni den caso di Sint Maarten, ta viola Statuut y autonomia di nos paisnan. Nos mester actua semper dentro di margen di ley y segun principionan cu a wordo acorda riba e asunto aki. E conclusionnan di raport Biesheuvel cu nombramento di ministernan ta un asunto autonomo di paisnan, a wordo acorda door di Gobierno di Reino. Awe nos tin cu aplica e principio aki mescos den e caso di Sint Maarten. MEP y PDR a scohe atrobe pa no para ni pa Aruba, ni cu Sint Maarten.”    

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.