Diahuebs y diabierna siman pasa, Parlamento di Aruba a trata e Koninklijk Besluit (KB) cu Sint Maarten a haya for di gobierno di Reino. Hulanda lo tin indicacionnan di corupcion di politiconan di Sint Maarten. E KB ta trata un aanwijzing di gobierno di Reino dirigi na gobernador di Sint Maarten pa no firma decreto pa nombra ministernan, te ora un investigacion riba nan integridad ta duna motibo pa firma. Sint Maarten a puntra Aruba pa sosten, cual a resulta den e reunion, cu a wordo yama den corto tempo.

E prome dia di e reunion, representantenan di tur fraccion tawata presente. A mustra cu esfuerso tawata wordo haci pa yega na un mocion cual tur fraccion lo sostene. Esey no a logra, y MEP a contempla di entrega nan propio mocion. E fraccionnan si tawata di acuerdo cu otro tocante e necesidad di un geschillenregeling pa conflictonan den Reino.

Ora e reunion a continua diabierna, solamente fraccion di AVP tawata presente. Parlamentarionan di AVP a duna hopi critica riba e ausencia di MEP y PDR. Cu solamente fraccion di AVP presente, un mocion a wordo aproba unanimamente.

AVP
Miembro di fraccion AVP, sra. Mervin Wyatt-Ras, a decribi e ausencia di MEP como un acto di cobardia y oportunismo politico. Segun sra. Wyatt-Ras, e posicion cu MEP a tuma no ta cuadra cu e ideologia di MEP cu sra. Wyatt-Ras a conose.
Sr. Rene Herdé a categorisa e ausencia di tanto MEP y PDR como “puro oportunismo politico partidista”.
Durante e reunion, parlamentarionan di AVP un pa un a expresa nan pensamento riba e ausencia di MEP y PDR. Den nan opinion, parlamentarionan di MEP y PDR a traiciona Aruba y Sint Maarten. Nan ta di opinion cu, mescos cu na Aruba, Hulanda a mina e derecho di autodeterminacion di Sint Maarten, y consecuentemente su autonomia. Cu e mocion nan a mustra nan sosten pa gobierno di Sint Maarten.

MEP
Miembro di fraccion MEP, sr. Ady Thijsen, a mustra di ta cauteloso riba e topico di sostene Sint Maarten como Parlamento di Aruba, y tuma un posicion contra Hulanda. Segun sr. Thijsen, Aruba tin su propio problemanan y mester tene cuenta cu posibel consequencianan politico di tuma un posicion contra Hulanda den e situacon aki.
Lider di MEP, sra. Evelyn Wever-Croes a duna un splicacion di nan ausencia: "na prome lugar pasobra tin hopi otro problemanan mas urgente aki na Aruba pa atende, cuminsando cu e KB di Aruba mes, pero cu AVP no kier trata! Ademas, na mi humilde opinion, Sint Maarten su premier sra. Sarah Wescott tabata demasiado prematuro den duna sosten na Mike Eman den su welga di hamber na juli ultimo, pasobra despues a resulta cu ta Mike Eman mes a entrega nos autonomia, y pues cu e welga di hamber no tabata funda. Nos no kier comete e mesun eror. Nos no conose tur e detayes tras di e KB di Sint Maarten, y nos no ta kere ta responsabel ni prudente pa duna expresion nan al respecto na e momento aki.”
Segun sra. Xiomara Ruiz-Maduro; “Parlamento di Aruba tin un compromiso cu e Pueblo di Aruba promer cu tur otro. Te ainda Parlamento di Aruba den un reunion publico no a debati riba nos propio KB y rapport di CFT. Den un situacion asina aki Parlamento no por permiti su mes e luho di trata KB di un otro Pais enves di esun di su propio Pais.”

Comunicadonan relaciona cu e reunion en cuestion:
Evelyn Wever-Croes: En bes di trata e KB di Aruba, AVP kier papia solamente di KB di Sint Maarten
Mervin Wyatt-Ras: E lucha di Betico a wordo tira afor dor di fraccion di MEP
Rene Herdé: MEP y PDR no ta para pa Aruba. Nan no ta para cu amigonan tampoco.
Rene Herdé: Parlamento di Aruba ta sostene autonomia di Sint Maarten den mocion
Xiomara Ruiz-Maduro: Fraccion di AVP kier sende luz na caya pa otro cana y den nos cas mes ta laga Pueblo wander den scur
Xiomara Ruiz-Maduro: Awe Mervin ta sostene Mike y traiciona e lucha di Betico Croes pa oportunismo politico
Rene Herdé (AVP): MEP a rechasa e mocion-den-concepto cu tur tres fraccion a yega na dje

Expresionnan haci den e articulo aki no necesariamente ta refleha opinion di ArenaPoliti.co