Conseho di minister di Gobierno di Reino a acepta e proposicion di minister Ronald Plasterk (Hulanda) pa nombra drs. J.A. ‘Alfonso’ Boekhoudt como e proximo gobernador di Aruba. Sr. Boekhoudt actualmente ta minister plenipotenciario di Aruba na Hulanda. Sr. Boekhoudt a wordo nombra pa un periodo di 6 aña. Ta posibel pa renombra sr. Boekhoudt despues di e periodo aki. Sr. Boekhoudt lo asumi e posicion di gobernador dia 1 di januari 2017, reemplasando nos gobernador actual sr. Fredis Refunjol.

Conseho di minister di Gobierno di Reino tambe a nombra sra. Y.V. 'Yvonne' Lacle-Dirkz como gobernador interino di Aruba, cual nombracion lo bay na vigor dia 1 di november 2016. E lo reemplasa gobernador interino actual sra. A. ‘Ella’ Tromp-Yarzagaray.

Angel Bermudez
Gabinete Mike Eman II tawata kier pa minister Angel Bermudez wordo nombra como e proximo gobernador, pero Hulanda no a comparti e deseo aki. Pues drentando den un aña di eleccion, minister Bermudez por keda den funcion como minister di finansas mientras cu Aruba lo conoce un gobernador nobo. ArenaPoliti.co no tin informacion ainda tocante un reemplasante di sr. Boekhoudt como minister plenipotenciario di Aruba na Hulanda.

Expresionnan haci den e articulo aki no necesariamente ta refleha opinion di ArenaPoliti.co