E ultimo añanan e discusion di Zwarte Piet ta keda bira mas fuerte. E critica principal ta cu e figura Zwarte Piet tin elementonan discriminatorio na personanan color scur, y cu Zwarte Piet lo ta representa un esclavo. Mientras cu mayoria politico ta purba keda leu di e discusion aki, toch e tema a haya atencion di tanto politico cu no kier pa e figura Zwarte Piet keda mane e ta, y politico cu ta insisti cu mester cambi’e. Na Hulanda, partido PVV di Geert Wilders a bay asina leu di propone un ley pa mantene Zwarte Piet preto of bruin scur.

Si bo puntra hende kico e origen di Zwarte Piet ta, bo lo tende diferente storia. E lo ta un homber blanco cu a bira preto door di pasa door di un schoorsteen. Of e ta un moro, cual ta referi na e poblacion Islamitico cu a colonisa Spaña den edad medio. Hopi lo bisabo cu nan no sa. E diferente storianan en berdad a wordo siña na mucha y adulto durante hopi aña. Pero kico ta e origen berdadero di e figura Zwarte Piet, y dicon e storia a keda cambia? Y cua elementonan stereotipo Zwarte Piet tin? ArenaPoliti.co a dicidi di busca contesta riba e preguntanan aki.


E prome Zwarte Piet
E prome biaha cu e figura Zwarte Piet a aparece tabata alrededor di 1850 den e buki ‘Sint Nicolaas en zijn Knecht’ di Jan Schenkman. Prome cu e temporada ey, Sinterklaas no tabata tin un ayudante (knecht). E nomber ‘Zwarte Piet’ no tabata wordo usa den e buki. Te alrededor di 1895 e nomber Zwarte Piet a bira mas comun (prome cu esey ela wordo yama ‘Pieter me knecht’).
Den e buki di Jan Schenkman, e knecht tabata illustra como un sirbido color scur, y no tabata tin stereotiponan racial. E tabata bisti un uniform di sirbiente pero e no tabata tin lipnan pinta cora, oorbel grandi etc. E stereotiponan racial a wordo añadi y a sigui bira mas exagera despues den siglo 20, caminda cu e ayudante a wordo desaroya den e Zwarte Piet cu nos conoce awe.


Mitologia Germanico
E figura historico di San Nicolas a nace na Patara (awendia den Turquia). Pero tambe den folklor por atribui Sinterklaas na e storia di e dios Germanico yama Wodan. Wodan tabata den cielo y tabata tin su equivalente den fierno, un asina yama spirito subterraneo cu den mitologia Germanico semper tabata wordo representa como color scur.

Un teoria ta cu e spirito subterraneo aki ta un fuente di Zwarte Piet su color preto. Considerando cu e prome ilustracionnan di Zwarte Piet obviamente ta mustra un persona di etnicidad color scur, y cu Zwarte Piet tabata wordo describi como un “kroesharige neger” den diferente publicacion, ta deshaci di e teoria aki.


Vestuario di Zwarte Piet
Segun Elmer Korin, docente di historia di arte na Universidad di Amsterdam, no tin duda cu e figura di Zwarte Piet tin influencianan di mucha color scur cu tabata esclavo. Cu pintura y historia di siglonan 17 y 18 e ta mustra riba e similaridadnan den e pañanan cu mucha esclavo y Zwarte Piet ta bisti. Segun Korin, ta conosi cu e esclavonan no tabata gusta bisti e costuum.


Blackface
Zwarte Piet ta wordo compara hopi cu ‘blackface’. Blackface ta algo cu hopi Hulandes no sa di dje. Na Merca (y despues tambe na otro paisnan manera Inglatera) den siglo 19 y 20, personanan color scur no tabata mag di actua den teatro y den mundo di television. Pues un hende color cla lo pinta su cara preto cu make-up pa asina representa y expresa stereotipo di un persona color scur. Hopi biaha haciendo esaki na un manera comico y exagera pa entretenimiento di e publico color cla.

Na dado momento hasta hende color scur mester a cuminsa pinta nan mes preto pa mag di practica nan instrumento riba escenario.

E practica di blackface a cuminsa rond di 1830 y a sigi pa mas cu 100 aña. E tabata algo hopi popular na Merca, y despues tambe na paisnan Europeo. E manera cu e ‘knecht’ di Sinterklaas a wordo transforma di un sirbido color scur pa e Zwarte Piet ful preto cu lipnan cora etc., ta duna e impresion cu Blackface a influencia e imagen di Zwarte Piet. Especialmente considerando e temporada di e desaroyo aki.

Blackface a wordo bandona den añanan 60 di siglo 20, ora cu e Civil Rights movement na Merca a cuminsa ricibi suficiente sosten pa exigi cambio. Awendia e no ta wordo usa mas pasobra e ta wordo considera racista y ofensivo.


Esclavitud
Awendia, masha hopi hende no ta kere cu un figura cu ta forma parti di e cultura Hulandes por tin di haber cu esclavitud. Hopi tin e impresion cu Hulanda no tabata envolvi den e practica di esclavitud y bendemento di esclavo. No ta straño cu hopi Hulandes tin e impresion ey, ja cu Hulanda no ta dedica mucho atencion na e parti aki di nan historia. E materia cu scolnan na Aruba ta siña studiantenan, ta basa riba e curiculo Hulandes, pues no ta straño cu na Aruba tambe tin e mesun falta di conocemento riba e tema aki.

E realidad ta cu Hulanda ta responsabel pa traslada alrededor di 550.000 Africano for di Africa pa otro parti di mundo, for di cual alrededor di 75.000 lo a muri prome cu nan a yega nan destinacion. Te na 1863 Hulanda e aboli esclavitud. No por descarta cu e fenomeno di esclavonan Africano a influencia loke a bira Zwarte Piet.


Stereotipo
Banda di e discusion di e origen di Zwarte Piet, tin discusion riba e elementonan stereotipico di personanan color scur. Similar na blackface, Zwarte Piet tin lipnan accentua pa pone nan mustra mas diki, cual ta un stereotipo di hende color scur. Esaki ta wordo haci den un forma exagera, especialmente den ilustracionnan di Zwarte Piet.

Un otro aspecto cu ta wordo considera stereotipico ta e renchi di orea di Zwarte Piet. E estilo di e renchi di orea ta e estilo ‘creol’ di Africano. Manera menciona caba, e costuum di Zwarte Piet ta similar na e costuum cu mucha color scur esclavo mester a bisti.

Un desaroyo cual pa motibonan obvio a bira menos cu tempo, ta e custumber pa Zwarte Piet papia cu un accent Surinameo, hopi biaha exagera. No tabata algo straño pa wak Zwarte Pieten riba television Hulandes ta papia manera Surinameo, bailando loco riba musica Caribense, y actua manera hende bobo. Sigur e lo a pone mucha hari, pero na mesun momento tabata haci bofon di Surinameo color scur, cual tabata e grupo mas grandi di imigrantenan na Hulanda den e temporada ey.


Falta di conocemento
Awendia, mas y mas Hulandes ta bisa cu nan no tabata conose e historia di Zwarte Piet, y tampoco tabata sa mucho di esclavitud en general y participacion di Hulanda den esaki. Nan a lanta cu Sinterklaas y Zwarte Piet y a celebra e tradicion tur aña inocentemente. Ta hasta culpa enseñansa Hulandes pa no dedica tempo na e parti aki di e historia Hulandes.

Mester remarca cu no ta corecto pa asumi cu esnan cu no kier cambia Zwarte Piet automaticamente ta racista. En berdad hopi a haci expresionnan y comete actonan racista den direccion di personanan color scur. Pero tambe tin hopi Hulandes, di cual hopi ta ‘pro Zwarte Piet’, cu no ta racista. Hopi Hulandes mes ta remarca cu tabata pa motibo di un falta di conocemento cu nan no por a wak algo malo den Zwarte Piet. Tambe ta wordo menciona cu no ta facil pa acepta y admiti cu un tradicion di bo pais, algo cu bo tin bunita recuerdo di dje como mucha, en berdad tin elementonan racista.

Segun Verene Shepherd (directora di Institute for Gender & Development Studies, profesora di historia social y miembro di e Working Group of Experts on People of African Descent di Nacionnan Uni), falta di conocemento ta e rason primordial dicon pueblo Hulandes no ta mira e malo den e tradicion di Zwarte Piet. “If you don’t know the history, you are not going to understand why some people are offended by this”, segun Shepherd.

Un comision special di Nacionnan Uni cu a investiga e fenomeno di Zwarte Piet, a yega na e conclusion cu e ta racismo y cu cambio mester bin den e apariencia di Zwarte Piet y su relacion cu Sinterklaas.

Cambionan
Mientras cu ainda hopi Hulandes no kier pa Zwarte Piet wordo cambia, e elementonan cu influencianan discriminatorio ta mustra di ta algo cu Hulanda no por ‘scapa’ for di dje. E aparencia y actuacion di Zwarte Piet a wordo cambia na varios ocacion. Tambe e storia cu ta wordo conta na mucha a cambia. Prome, Zwarte Piet tabata un sirbido color scur ‘no mucho sabi’. Cu tempo ela bira un ayudante cu no ta un persona color scur, pero a bira scur door di pasa door di un schoorsteen. Hopi di e cambionan a wordo haci despues di basta critica riba Zwarte Piet. Contrario na loke hopi persona ta kere, for di algun decada pasa caba tin critica riba Zwarte Piet. Den hopi caso e critica a wordo considera na su lugar, cual a conduci na varios di e cambionan. Pero e cambio principal cu mayoria di esnan cu kier cambia Zwarte Piet kier wak (schmink preto), te ainda no a wordo acepta completamente.

Mientras cu e discusion tocante Zwarte Piet mas tanto ta trata si Zwarte Piet ta un figura racista, poco poco ta wordo acepta cu no por nenga cu Zwarte Piet tin elementonan cu influencianan discriminatorio. Pa esnan cu conoce e historia di Zwarte Piet, e pregunta principal den e discusion no ta ‘si Zwarte Piet tin elementonan racista’, pero ‘si mester cambia e elementonan racista’.

Ultimo añanan ta mustra cu e cara completamento preto tambe lo wordo cambia. Na Korsou por a mira Pieten cu schmink di diferente color. Na yegada di Sinterklaas na Surinam, e Zwarte Pieten a wordo remplasa cu Candy Queens. Durante e yegada di Sinterklaas na Hulanda e aña aki por a nota Zwarte Pieten cu tin solamente un tiki preto den nan cara (‘zwarte vegen’ di schoorsteen). Esaki ta e direccion cu diferente instancia encarga cu organisacion di actividadnan oficial di Sinterklaas kier bay cu Zwarte Piet. ‘Niet zwart als roet, maar zwart van roet’. Te ainda ta parse cu di tur e paisnan cu ta celebra Sinterklaas den e estilo Hulandes, Aruba lo ta e ultimo cu lo trece cambio den Zwarte Piet.

No mester lubida riba e grupo cu ta gosa mas hopi di e tradicion di Sinterklaas: muchanan. Ta mustra cu mayoria adulto ta di acuerdo cu e muchanan lo gosa mesun hopi di e tradicion si Zwarte Piet lo tin solamente ‘zwarte vegen van de schoorsteen’, of si Piet haya otro colornan.

Documentario 'Zwart Als Roet'

Expresionnan haci den e articulo aki no necesariamente ta refleha opinion di ArenaPoliti.co