Ken ta responsabel pa e aumento di schoolgeld?
Durante e ultimo simannan por a nota hopi comentario tocante e aumento di schoolgeld pa scolnan cu ta cay bou di Stichting Katholiek Onderwijs Aruba (SKOA). Ta trata di un aumento for di Afl. 75,- pa Afl. 250,- pa aña, sin conta gastonan di airco. Den e articulo aki ArenaPolit.co ta repasa diferente opinion y splica algun di e argumentonan.
“Mayornan no mag di keha”
Basta persona a vocifera e opinion cu Afl. 250,- pa aña no ta hopi, y cu mayornan no mester keha. E suma di schoolgeld ta mas cu Afl. 250,- pa hopi otro scol cu no ta cay bou di maneho di SKOA. Segun basta comentario, e mayornan a ‘traha’ e yui, pues nan mester cria e yui. Y parti di cria bo yui ta percura pa e haya enseñansa. “E mama/tata tin cu cria su yui, no gobierno!”. Hopi a bay mas leu, bisando cu e mamanan no kier paga schoolgeld, pero si tin placa pa cumpra tas caro, drecha huña, bay casino, sali bebe, etc. etc. Tambe por a lesa y scucha basta “unda e tata ta? Lag’e paga!”.
E realidad ta cu en berdad tin mayornan iresponsabel. Pero tambe tin bastante pobresa riba nos isla. Nos no por asumi cu tur ta iresponsabel. Afl. 175,- extra pa cada yui no ta facil pa yega na dje pa tur famia. “Dicon ba haya yui anto?!”, hopi lo ‘puntra’. Y pa e mayornan responsabel cu berdaderamente no ta logra paga schoolgeld, hende ta sugeri pa “manda nan sociale zaken y laga e otro mayornan cu mas placa paga e 250 Florin”.
Si nos considera e balor di enseñansa, Afl. 250,- pa aña no ta hopi. Pero e rasonamento ey kisas ta ‘missing the point’ completamente. Hopi mayor no ta di acuerdo cu e aumento, pero si mester, nan lo pag’e. Pa e mayornan aki, e ‘problema’ ta e motibo tras di e aumento.
"Gobierno su prioridadnan ta robes"
“E subsidio mester a wordo aumenta varios aña pasa caba. Si gobierno duna SKOA mas placa di subsidio, no tin necesidad pa aumenta schoolgeld”. Hopi a vocifera e punto aki, pero cuanto placa falta? Segun SKOA falta alrededor di 1,5 miyon Florin. Un suma relativamente abou si nos considera cuanto placa Gobierno ta paga pa otro gastonan cu, segun hopi, tin menos prioridad cu enseñansa. En esencia, e argumento aki ta insinua cu Gobierno su prioridadnan ta robes. Ehempelnan menciona ta entre otro e fonodonan cu tawata destina pa un scol nobo na Noord, cu Gabinete Mike Eman I lo a re-destina pa entre otro e tram den Caya G.F. Betico Croes, y cu awo lo tin mas tram na caminda atrobe. Tambe a menciona e cantidad halto di coordinador y a hasta haci calculacionnan di cuanto schoolgeld Gobierno por paga cu un salario average di coordinador. Segun parlamentario Bikker (PDR), Gobierno ta paga alrededor di Alf. 600.000,- pa aña na huur pa Rietveld Academie, mientras cu no lo tin (mucho) mas cu 10 studiante. Otro ehempelnan cu a wordo menciona ta mas gastonan di huur, PR pa minister(nan), biahamento, y inversionnan den proyectonan cu ta ser considera inecesario actualmente.
Hopi ta considera e situacion financiero fragil di pais Aruba e fuente principal pa e aumento, rasonando cu, si nos situacion financiero tawata bon, facilmente Gobierno por aloca 1,5 miyon Florin. Ainda Gabinete Mike Eman I y II (AVP) ta culpa Gabinete Oduber III y IV (MEP) pa nos situacion financiero. Pero despues di mas cu cinco aña bou maneho di Gabinete Mike Eman I y II, y despues di a crea un impresion mas positivo cu e realidad (segun instancianan internacional), mas hende a cuminsa tene e Gobierno actual principalmente responsabel pa nos situacion financiero. Gobierno a wordo adverti cu nan escogencianan financiero ta limita e capacidad di pais Aruba pa haci invercionnan substancial den enseñansa, pa garantisa cu Aruba por ofrece cada hoben enseñansa pagabel di bon calidad.
Otro punto ta cu, considerando e medidanan cu Gobierno a implemeta (y esunnan cu probablemente lo wordo implementa pronto), Gobierno mester ta consciente cu ta un mal momento pa un aumento (drastico) di schoolgeld. Na mesun momento por a scucha basta hende bisa cu SKOA (un stichting) ta determina e suma di schoolgeld y cu Gobierno y minister di enseñansa no ta responsabel pa esey.
"SKOA ta responsabel"
Ta berdad cu SKOA ta determina e suma. Basicamente, SKOA ta cobra mayornan e diferencia negativo entre e subsidio di Gobierno y e gastonan. Den otro palabra, si Gobierno subsidia cu mas placa, mayornan por paga menos cu Afl. 250,-. SKOA tambe por purba di baha su gastonan, pero segun SKOA y hopi docente, SKOA y scolnan a ‘cremencha’ basta caba y berdaderamente no tin mucho mas espacio pa baha gasto responsablemente.
Tocante e suma di subsidio, SKOA a splica cu aña pasa, Gabinete Mike Eman II a duna SKOA 10% menos na subsidio, banda di e 10% cu gobierno ta retene na prome instante caba. Directora di SKOA sra. Jossette Daal a hasta laga sa cu e reduccion di subsidio aki ja caba tawata tin como consecuencia cu “scolnan no tabata tin tur e materialnan necesario cu ta importante pa a duna un enseñansa di calidad.”
SKOA lo a informa minster di enseñansa sra. Michelle Hooyboer-Winklaar cu, si e situacion financiero di SKOA (subsidio, gastonan) no mehora, nan lo mester aumenta schoolgeld. Esaki lo a tuma luga basta luna pasa caba. Minister Hooyboer-Winklaar a laga sa cu ela manda un carta pa SKOA na november 2014 pa informa tocante e aumento, pero no a ricibi contesta na prome instante. Despues cu entre otro sr. Rocky Kelly a laga sa cu lo bin un manifestacion dilati oficina di SKOA, minister Hooyboer-Winklaar a follow up y a logra reuni cu SKOA net prome cu e manifestacion.
Minister Hooyboer-Winklaar a laga sa cu un retraso di SKOA den entregamente di jaarrekeningen ta strobando e proceso di duna e 10% na subsidio cu falta. Ta custumber cu ora di duna subsidio, gobierno ta duna 90% prome, y ora e stichting mustra por medio di su jaarrekening cu e 90% (+ 10% cu e stichting mes ta ‘schiet voor’) a wordo usa pa cubri e gastonan manera a wordo palabra, Gobierno ta verreken e ultimo 10%. Sin jaarrekening, Gobierno no ta duna e ultimo 10%. Na mes momento SKOA a laga sa cu nan si a entrega jaarrekeningen di 1998 te cu 2010, y ainda ta wardando e verrekening di 10%.
Y awo…?
Minister Hooyboer-Winklaar y SKOA ambos a laga sa cu nan lo purba busca un manera pa preveni e aumento actual. Minister Hooyboer-Winklaar a vocifera cu e no ta contra un aumento, pero ta prefera di wak esaki wordo implementa den algun fase enbes di un aumento drastico den un biaha. Ela sugeri un aumento di Afl. 50,- e aña escolar venidero, y pa despues evalua si e suma mester keda subi. No ta conosi ainda si Gobierno lo haci esey posibel door di 'verreken' cu SKOA y/of aumenta e subsidio.
En todo caso, e minister y directiva di SKOA a sinta na mesa y lo sigui wak e posibilidadnan. Algo cu segun hopi mester a wordo haci hopi tempo pasa caba. E timing di ora minister Hooyboer-Winklaar y SKOA a sinta na mesa ta indica cu e presion di e manifestacion dilanti SKOA a hunga un rol den e deliberacion pa baha e suma.
Considerando tur e desaroyonan, tin un bon chens cu schoolgeld lo bira menos cu Afl. 250,-. Factornan cu probablemente ta y lo influencia e decision aki ta e presion di Pueblo (manifestacion, comentarionan, opinion publico), e hecho cu Gobierno/minister di enseñansa keto bay ta (politicamente) responsabel pa enseñsa, y e impacto politico di e decision. Si e suma no baha substancialmente, por spera cu parlamentario(nan) lo entrega amienda y/of mocion pa purba baha e suma durante tratamento di presupuesto 2015.
Clausurando cu un ultimo opinion: "Inverti den enseñansa ta un di e miho inversionnan cu un pais por haci. Hopi biaha, rond mundo, politico na mando ta prefera di inverti mas den cosnan cu votadonan por wak y cu ta duna resultado prome cu siguiente eleccion. Un maneho cu por tin como consequencia cu gastonan di enseñansa ta subi mas lihe cu Gobierno su inversion den enseñansa. Tambe tin paisnan, grandi y chikito, cu a dicidi pa inverti hopi mas den enseñansa. Tin paisnan cu a of lo elimina schoolgeld completamente pa sierto nivel di enseñansa (Corsou, Alemania, Suisa, U.S.A. y mas). Na Aruba, e situacion financiero no ta permiti esey. Al contrario. Na Aruba tin hasta problema cu muchanan ta bin scol cu hamber y docente ta cumpra cuminda pa nan. Tin biaha docente ta paga pa sierto material paso scolnan tin cu corta mas gasto. Hopi no kier realisa cu e situacion financiero malo di Aruba ta causando un chain reaction cu ta afectando nos enseñansa, y hopi mas. Lo tuma mas cu SKOA, mayornan y 1 minister pa mehora e desaroyonan negativo aki."
Kiko abo ta pensa?
En todo caso, e minister y directiva di SKOA a sinta na mesa y lo sigui wak e posibilidadnan. Algo cu segun hopi mester a wordo haci hopi tempo pasa caba. E timing di ora minister Hooyboer-Winklaar y SKOA a sinta na mesa ta indica cu e presion di e manifestacion dilanti SKOA a hunga un rol den e deliberacion pa baha e suma.
Considerando tur e desaroyonan, tin un bon chens cu schoolgeld lo bira menos cu Afl. 250,-. Factornan cu probablemente ta y lo influencia e decision aki ta e presion di Pueblo (manifestacion, comentarionan, opinion publico), e hecho cu Gobierno/minister di enseñansa keto bay ta (politicamente) responsabel pa enseñsa, y e impacto politico di e decision. Si e suma no baha substancialmente, por spera cu parlamentario(nan) lo entrega amienda y/of mocion pa purba baha e suma durante tratamento di presupuesto 2015.
Clausurando cu un ultimo opinion: "Inverti den enseñansa ta un di e miho inversionnan cu un pais por haci. Hopi biaha, rond mundo, politico na mando ta prefera di inverti mas den cosnan cu votadonan por wak y cu ta duna resultado prome cu siguiente eleccion. Un maneho cu por tin como consequencia cu gastonan di enseñansa ta subi mas lihe cu Gobierno su inversion den enseñansa. Tambe tin paisnan, grandi y chikito, cu a dicidi pa inverti hopi mas den enseñansa. Tin paisnan cu a of lo elimina schoolgeld completamente pa sierto nivel di enseñansa (Corsou, Alemania, Suisa, U.S.A. y mas). Na Aruba, e situacion financiero no ta permiti esey. Al contrario. Na Aruba tin hasta problema cu muchanan ta bin scol cu hamber y docente ta cumpra cuminda pa nan. Tin biaha docente ta paga pa sierto material paso scolnan tin cu corta mas gasto. Hopi no kier realisa cu e situacion financiero malo di Aruba ta causando un chain reaction cu ta afectando nos enseñansa, y hopi mas. Lo tuma mas cu SKOA, mayornan y 1 minister pa mehora e desaroyonan negativo aki."
Kiko abo ta pensa?
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...