Cu masha alegria nos a ricibi e grato noticia cu e compania CITGO a confirma di lo sigi cu e proceso pa reapertura di nos refineria.

Ainda e ta fresco den nos memoria con mi colega di fraccion, sr. Glenbert Croes, a hasi tur esfuerso posibel pa asina e ehecutivonan di CITGO cuminsa negocia e reapertura di nos refineria cu Gobierno di Aruba.
Ta na varios ocasion, y riba propio forsa, Glenbert Croes a logra reuni cu ehecutivonan di PDVSA pa asina purba convence nan cu e refineria di Aruba ta apto pa nan inverti den dje.
Manera cu ta conoci, e compania CITGO ta propiedad di PDVSA, y como tal sr. Glenbert Croes a dicidi di bay papia directamente cu e doñonan di CITGO pa asina sigura cu Gobierno di Aruba por a haya e oportunidad di negocia e reapertura.

E ta bergonsoso di mira cu despues cu Gobierno a confirma cu lo desmantela e refineria e luna aki, awor Minister de Meza kier bula cu hala di manteca tumando merito di otro riba su nomber.
Nos no mag lubida cu ta sr. Mike de Meza a sali publicamente bisando cu lo desmantela refinera. Nos no mag lubida cu ta e mesun sr. Mike de Meza a bisa publicamente cu no tabatin interesado pa habri Aruba su refineria.
Nos no mag lubida con e miembronan di partido AVP a chercha sr. Glenbert Croes ora cu e tabata den combersacion cu e ehecutivonan di PDVSA.
Pero como un bon circo politico cu e partido berde ta, y manera ta nan custumber, awor e politiconan di partido AVP kier gaña pueblo un biaha mas bisando cu ta nan ta logrando e reapertura di nos refineria, caminda poco luna atras nan mes tabata practicamente celebrando e desmantelacion cu lo mester a tuma lugar.

Pero awe, nos pueblo di San Nicolas y Aruba completo ta bolbe mira un speransa. E anhelo di mas grandi den e ultimo temponan aki ta cada bes mas serca di ta un realidad.
Tur nos yiunan di tera cu ta trahando na otro paisnan, tin e speransa bibo di por bolbe Aruba y reuni cu nan famia.
Aunke ainda no tin un seguridad absoluto cu CITGO lo habri e refineria bek, nos ta positivo cu pronto e noticia definitivo lo drenta.

Lo ta interesante pa mira si un Minister cu a perde 700 voto den e ultimo eleccion lo para na banda di San Nicolas, of e lo tin menos relevancia cu un Minister cu ta cla y dispuesto pa lanta AVP 2 y cu ta contra e reapertura di e refineria.

Expresionnan haci den e articulo aki no necesariamente ta refleha opinion di ArenaPoliti.co