Prome cu fin di aña gobierno lo bai anuncia cu nan a yega na un acuerdo hunto cu PDVSA CITGO pa por habri e refineria atrobe. Obviamente ta toca gobierno di Aruba como e partido cu ta bai firma e acuerdo cu CITGO pa anuncia e gran noticia aki na pueblo cual mi tin simannan ta anticipando y preparando pueblo pe. Esaki ta un logro grandi pasobra e solo hecho cu tur otro grupo den nos comunidad a uni y lucha pa habri e refineria awe por mira cu ta bai cosecha su frutonan pa nos pueblo. E satisfaccion di por a aporta y awe mira cu esaki lo bai bira realidad ta algo grandi.

Apesar cu e impreshon ta wordo crea cu ta bringa pa haya credito pa re-apertura di e refineria nos kier enfatisa cu E LOGRO DI E REAPERTURA DI E REFINERIA CU PDVSA/CITGO TA UN LOGRO DI HENTER NOS DIGNO PUEBLO. Ami ta convenci y reconociendo loke colega Andin Bikker a hasi relaciona cu e comicion institui pa habri e refineria cu na e momento ey gobierno no tawatin un operador y ta pesei mes nan kier a desmantela e refineria. Basa riba e hecho cu ni valero y gobierno tawatin un operador mi a dicidi manda un email riba 28 april 2015 na sr. Eulogio del Pino. Esaki a pone cu ma logra reuni despues di 6 siman pa reuni cu vice presidente sr. Luongo di PDVSA pa por a presenta e vision tocante e refineria. E email cu a ser manda pronto lo wordo publica y ta e muestra di iniciativa tuma pa yega na un operador nobo pa e refineria. Sigur e tin su balor historico.

Durante e reunionan tambe nos a papia tocante opera e refineria cu gas pa despues suministra esaki na WEB pa por elimina hedging y brandstofclausule pa por baha prijsnan di awa y coriente. Tawatin dos opcion sea PDVSA of su subsidiario CITGO por a opera refineria. Cu Gabinete Eman a laga sa cu no tawatin un operador interesa tawata un mentira flagrante. Gobierno di Aruba a sconde tras di Valero pasobra tawata obvio cu Valero kier a keda cu e transhipment y gobierno tawata determina pa desmantela e refineria.

Danki dios na rosea di pueblo y accionan tuma door di oposicion. Ta peseie credito mester bai na pueblo completo cu a vocifera na un forma contundente a expresa cu kier e refineria bek. Awor tur partido ta cla pa hasi e transaccion y Gabinete Eman mester subi e trein y anuncia e bon noticia aki na pueblo.

Expresionnan haci den e articulo aki no necesariamente ta refleha opinion di ArenaPoliti.co