Produccion di awa y coriente, transporte y te hasta turismo

ORANJESTAD – “Nos tin diferente beneficio ora nos ta papia di e suministro di gas natural pa Aruba,” asina Minister di Asunto Economico, Energia, Comunicacion y Medio Ambiente, ing. Mike de Meza a declara. E ta referi na e multiple aplicacion cu nos pais por saca di e suministro di gas natural pa operacion di e refineria na San Nicolas.

Un bes cu a establece e pipanan di suministro di gas, e posibilidadnan ta ainda mas grandi y tur esaki ta papia caba den e acuerdonan haci y den e MOUnan firma. Minister ing. de Meza a papia di con e gas natural ta sirbi tambe pa un operacion mas eficiente di nos compania di produccion di awa y coriente, WEB Aruba N.V. Otro ehempel di un uso beneficioso di gas natural riba nos isla ta den transporte publico, pero tambe transporte en general.

Te hasta turismo por conoce un impulso danki na e suministro di gas natural. “Hopi cruiseship ta cambiando nan fuel for di bunker fuel pa bay over pa LNG cu ta haci’e mas atractivo un bes cu bo tin e suministro ey na Aruba,” asina e titular di Energia a splica. Un bes cu e liñanan di crucero sa cu na Aruba nan por stop y ademas di haya un tremendo ‘port of call’ y alabes ‘tank’, sin duda algun, Aruba lo ta un opcion hopi mas conveniente compara cu otro islanan den Caribe.

Expresionnan haci den e articulo aki no necesariamente ta refleha opinion di ArenaPoliti.co