Durante un entrevista cu a tuma luga 16 di januari 2017, parlamentario Andin Bikker a contesta preguntanan di ArenaPoliti.co relaciona cu un concepto di ley di parlamentario Dangui Oduber. E concepto di ley di sr. Dangui Oduber ta encera un cambio den kiesverordening cu lo percura cu e secuencia di cua candidato di un partido politico ta drenta Parlamento lo bay a base di cantidad di voto y no a base di number riba lista.

ArenaPoliti.co a puntra sr. Bikker su opinion riba e concepto di ley aki.
Andin Bikker: “E sistema cu sr. Dangui ta bogando p’e ta un sistema cu nos a aplica den Democracia Real pa tres eleccion caba. Nos a aplic’e via un protocol cu tur hende [candidato] ta firma. Nunca nos no a yega na aplicacion di dje paso lamentablemente semper nos a keda pega na 1 asiento, y toch mi mester bisa cu den e secuencia di votonan semper e tabata concurente cu e numerahe riba lista.”

Sr. Bikker ta afirma cu partido POR, di cual sr. Bikker ta un co-fundador y candidato pa eleccion 2017, ta sostene e concepto di ley di parlamentario Dangui Oduber. Bikker ta remarca cu e principio di e concepto no ta nobo, y cu e ta kere cu MEP kier haci’e un ley pa preveni retonan interno. Bikker: “E plataforma Forsa Nobo ta sostene e concepto di sr. Dangui Oduber pasobra ami, mi partido, mi persona, hasta ma yegi presenta un pre-concepto di ley pa cu esaki caba. Dus nos ta sostene un concepto paso nos a yeg’i bin cun’e caba. Y nos [PDR] a bib’e tres eleccion caba. Dus e ora e principio no ta nobo, nada mas aworakinan mi ta kere di parti di Movimiento Electoral di Pueblo nan tambe tin nan retonan… of nan ta premira cu nan ta bay tin retonan. Pasobra semper ora bo traha lista tin retonan, tin diferencianan di opinion etc. Anto mi ta kere pa un lider e ta suavisa bo bida un tiki… vooral si bo ancr’e den un ley.”
Andin Bikker ta añadi cu e no ta kere cu e ley lo wordo aproba den Parlamento: “E indicacion lamentablemente ta si cu e concepto no tin sosten di parti di AVP.”

“E plataforma Forsa Nobo ta sostene e concepto di sr. Dangui Oduber pasobra ami, mi partido, mi persona, hasta ma yegi presenta un pre-concepto di ley pa cu esaki caba. Dus nos ta sostene un concepto paso nos a yeg’i bin cun’e caba.”

Secuencia den partido POR
ArenaPoliti.co tambe a puntra sr. Bikker si den e caso cu e ley no wordo aproba, partido POR lo aplica e regla di secuencia di voto den un forma similar cu PDR a haci pa e ultimo tres eleccion.
Bikker: “E protocol tey, discusionnan ta si e protocol ey ta enforsabel.” Como ehempel sr. Bikker ta splica cu ela ricibi un peticion di partido MAN (Corsou) pa manda nan e protocol, y MAN a aplica e protocol aki. E resultado di e eleccion na Corsou a trece un discrepancia entre e secuencia di number y cantidad di voto individual riba lista di MAN. Sr. Bikker a compronde cu a bin un discusion interno den MAN, y MAN a dicidi di pone e protocol un banda. Bikker ta cuestiona si e protocol ta huridicamente enforsabel.
Bikker: “Internamente nos no a dicidi te ainda si nos ta bay aplica e protocol. Nos ta voorstander di un cambio den ley paso e ora bo sa cu no ta bay tin discusion paso asina e ley ta. Si bo bay aplica un protocol anto si dado momento resultado bin anto ya caba ta premira cu ta bay bin discusion y hende ta bisa ‘no, nos ta bay challenge e protocol huridicamente’… e ora bo ta puntra bo mes ki forsa e protocol tin. Ideal ta si por, ohala, cambia e ley anto e ora tur hende sa ‘waar ze aan toe zijn’.”  

Sr. Bikker tambe a expresa cu partido POR tin otro prioridadnan den e fase actual di transicion di e union, manera aspectonan organisatorio y un programa. Segun sr. Bikker trahamento di lista no a bin ‘aan de orde’ ainda.

“Importante ta pa nos lo por yega na un miho resultado electoral cu si nos a bay cada un riba nan mes.”

Liderazgo comparti
Andin Bikker ta splica cu e liderazgo di POR a wordo regla den un protocol y cu su persona y Otmar Oduber ta compati liderazgo di e partido. Bikker: “Nos ta aplicando esey den practica tambe… Ami cu sr. Oduber tin dialogonan diario. Tur decision importante ta wordo consulta ‘over en weer’ y mi ta kere cu nos ta complimenta otro hopi bon mes.” Sr. Bikker ta haci un comparacion, bisando cu den pasado PPA tawata tin un ‘triumviraad’, pues tres persona tawata lidera e partido. Bikker ta pone e asunto den un perspectiva bisando cu den historia politico, hasta den tempo di e Romanonan, tawata tin liderazgo comparti bou di dos of tres persona. Bikker: “Pa’mi e no ta di importancia. Importante ta pa nos lo por yega na un miho resultado electoral cu si nos a bay cada un riba nan mes.”


Number 1
Pa loke ta trata ken lo ta e ‘lijsttrekker’ (number 1 riba lista) di partido POR, sr. Bikker ta contesta cu POR tin un procedura interno, via un comision, pa yega na e secuencia di number di lista. Bikker: “Na final di dia, door di e leynan cu nos tin, un hende lo mester ta number 1, un hende mester ta number 2. Si e cambio di ley bin [concepto di sr. Dangui Oduber]… e ora numerahe no ta bay tin importancia mas. Pero nos tin un procedura den e statuut con ta bay determina, mescos cu tur partido, tur partido tin un procedura con bo ta yega na e [numerahe].”

“…e hecho cu mi persona a dicidi di ‘give in’ un tiki ariba mi ego pa bay den un cooperacion pa bay purba di haya un miho resultado electoral, e ora e detayenan di si ta number 1, number 2… pa’mi e no ta relevante…”

Sr. Bikker ta considera e asunto aki “prematuro” y ta añadi: “Ami mes, personalmente, pa’mi e no ta dje relevante paso e hecho cu mi persona a dicidi di ‘give in’ un tiki ariba mi ego pa bay den un cooperacion pa bay purba di haya un miho resultado electoral, e ora e detayenan di si ta number 1, number 2… pa’mi e no ta relevante paso si ta echt mi tawata tras di number, posicion y liderazgo lo mi no a bay den e cooperacion aki mes. Una bes cu bo bay den un cooperacion tur hende ta basha un tiki awa den e biña y tur hende ta dim nan ego un tiki pa un miho resultado electoral.”

Expresionnan haci den e articulo aki no necesariamente ta refleha opinion di ArenaPoliti.co