Prome minister Mike Eman na varios ocasion a splica cu su maneho economico ta uno basa riba inversion. Sr. Eman a defende e aumento di debe bou di su maneho referiendo entre otro na un theoria di economista Paul Krugman y usando e frase di “eerst groeien, dan snoeien” como contraste di (entre otro) Hulanda cu a opta pa un maneho di mas austeridad pa maneha e efectonan di e crisis economico mundial (“eerst snoeien, dan groeien”). Durante un entrevista* cu parlamentario di MEP sra. Xiomara Maduro, ArenaPoliti.co a puntra e parlamentario pa su punto di bista riba e strategia economico di Gabinete Mike Eman.

Inversion vs. Consumo
Xiomara Maduro ta splica cu inverti den economia di pais Aruba ta algo bon. Pero segun e parlamentario esaki no ta locual Gabinete Mike Eman a haci. Xiomara Maduro: “[Mike Eman] a inverti den e economia di un grupo chikito so. E coordinadornan nan economia, y e sponsornan di campaña di [AVP] nan economia.” Xiomara ta elabora bisando cu si bo lesa rapportnan di Cft y loke Banco Central ta raporta, bo ta wak cu menos cu 1% di e placa cu a wordo gasta a bay na inversion. Maduro: “Por ehempel, Green Corridor, MFA’s cu e [Mike Eman] a bisa cu ela inverti… ta cosnan cu ainda Aruba tin cu bay paga pa nan. Kiermen no ta placa cu a wordo inverti. E inversion cu ela bisa cu e tawata haci ta consumo. Gobierno a consumi. Enbes cu nan a inverti, nan a consumi.” Como ehempel sra. Maduro ta menciona e cantidad di coordinadornan (mas cu 100 pa sr. Mike Eman) y e cantidad di biahenan cu sr. Eman a haci, entre otro e biahamento rond mundo pa yuda Hulanda haya un asiento den conseho di siguridad di Nacionnan Uni, riba gasto di pais Aruba. E parlamentario tambe ta splica cu prome minister Mike Eman a haci e aparato gubernamental mas grandi door di crea diferente departamento y ‘diensten’ y pone coordinadornan traha eyden cu un salario promedio di Alf. 9.000,- pa luna.

“Enbes cu nan a inverti, nan a consumi.”

Xiomara Maduro ta bisa cu Mike Eman por a usa e placa pa berdaderamente yuda pueblo, pero segun sra. Maduro, sr. Eman ta prefera di gasta placa di pueblo den un forma cu ta yud’e keda na poder, y cifranan ta refleha esey.

Debe y Confiansa
Parlamentario Maduro ta splica cu prome minister Eman a crea hopi debe cu su maneho, yegando un nivel di debe cu ta stanca economia di Aruba, cu mucho placa bayendo na paga interes di debe, y alavez un debe asina halto ta crea pobreza den nos pais. Sra. Maduro tambe ta di opinion cu sr. Eman como prome minister no a crea confiansa pa motibo di a gaña na varios ocasion y door di no ta transparente cu informacion. Segun Xiomara, asina un prome minister ta crea un clima den cual menos hende tin e confiansa pa inverti den economia di Aruba: “Den e falta di confiansa ey, bo economia ta para. E hendenan no ta saca nan placa. Mike no a crea confiansa pa e consumidor por tin confiansa y pa e inversionista por tin confiansa.” Sra. Maduro atrobe ta mustra riba cifra, referiendo na cifra di consumer confidence di Banco Central.

“Mike no a crea confiansa pa e consumidor por tin confiansa y pa e inversionista por tin confiansa.”

Xiomara Maduro: “Mike a bay den excessen, keriendo cu door di haci excessen e ta jump-start e economia. Pero pa jump-start un economia bo mester di mas cu simplemente haci exces. Mas importante ta cu mester refleha e trankilidad cu tin mester, pero tambe confiansa cu hende mester.” Segun e parlamentario, a pesar cu AVP tawata tin 13 parlamentario, cual mester duna un gabinete trankilidad pa goberna, Gabinete Mike Eman a tuma decisionnan robez y hinca placa den cosnan robez.

PPP
Sra. Maduro tambe a elabora riba e strategia di Gabinete Mike Eman pa financia proyectonan por medio di public-private partnerships (‘PPP’), manera Green Corridor, Watty Vos boulevard y renobacion di Hospital. Xiomara ta splica cu por medio di e sistema di financiamento aki, Gabinete Mike Eman ta bin cu proyectonan cu no ta wordo paga ainda, pero lo mester wordo paga durante e siguiente decadanan (cu interes), acumulando na sumanan hopi mas halto cu e balor di e proyectonan. Xiomara Maduro: “Otro gobierno tin cu bay wak con nan ta ‘make ends meet’ pa paga esakinan plus sirbi e pueblo manera mester ta... Mike a crea un peso grandi riba e generacionnan nos dilanti, pero tambe pa e gobiernonan nos dilanti. Cu e proyectonan PPP di 25, 30 aña, ela hinca e [futuro] gobiernonan den un skina caminda nan tin cu bay paga tur esey. Anto e ora bo tin cu puntra bo mes si esey tawata bon gobernacion.” 

“Mike a crea un peso grandi riba e generacionnan nos dilanti, pero tambe pa e gobiernonan nos dilanti.”

Ademas sra. Maduro ta cuestiona e prioridadnan di Gabinete Mike Eman: “E brug di Green Corridor, nos tawata tin mester di dje asina eynan? Nos tawata tin mester di e caminda ey mane cu e ta eynan? Ami ta kere cu nos mester a dedica na e binnenwegen cu nunca a haya asfalt.”


Si e maneho economico di Gabinete Mike Eman I y II no tawata bon, con un siguiente gobierno lo mester maneha nos economia? ArenaPoliti.co a haci sra. Maduro e pregunta aki. Klik aki pa lesa su contesta. 


*E articulo aki ta basa riba un entrevista cu a tuma luga 29 di november 2016.

Expresionnan haci den e articulo aki no necesariamente ta refleha opinion di ArenaPoliti.co