Perspectiva Independiente without background 001

Aruba mester ta contento cu CAft?

Mike Otmar 01
"Nos lo entrega nos curpa pa bisa Hulanda, mundo, cu nunca bo ta bay kita un milimeter di e Status Aparte di e pais aki."
Esey ta palabranan di prome minister Mike Eman, menos cu un aña pasa. Recientemente (4 mei 2015) sr. Eman a expresa den Parlamento di ta "sumamente contento" cu e protocol di 2 mei 2015 (Afspraken tussen de regeringen van Aruba en Nederland over de openbare financien van Aruba). Durante e mesun reunion sr. Eman a bisa cu locual nos antepasadonan a bringa p’e (autonomia) ta “sagrado”.

Minister Otmar Oduber a haci uso di Facebook pa felicita “esnan cu ta stima y defende nan Isla y su autonomia” cu e acuerdo.

Scuchando e ponencianan aki bo lo spera cu e protocol no ta afecta nos autonomia. Al contrario, indicacionnan ta cu Aruba a perde un parti di su autonomia. ArenaPoliti.co ta menciona algun punto cu ta indica un perdida di autonomia:
        • Sr. Eman y sr. Oduber ambos a mustra riba e punto cu implemantacion di CAft lo bay via Parlamento di Aruba por medio di un Landsbesluit. Esaki ta mustra di ta algo positivo considerando nos autonomia, te ora bo lesa articulo 10 y 11 di e protocol. Algun parlamentario di Fraccion AVP tambe a cuestiona e articulonan aki. Basicamente, Aruba mag di formalisa CAft via Parlamento, tanten cu e wordo haci mane a wordo palabra cu Hulanda, y sino lo por spera un KB/AMvRB. Ta crea un 'schijn van zeggenschap', mientras cu Aruba ta aceptando loke Hulanda impone via Cft. Y manera a bira custumber, Gobierno Hulandes ta coopera cu crea impresionnan eroneo pa e pueblo Arubano, tanten cu nan logra nan metanan.
      • Solamente un di e tres miembronan di CAft lo ta di parti di Aruba. E otro dosnan lo ta di parti di Hulanda, y di parti di Reino Hulandes (lesa Hulanda).

      • Segun NRC, un corant Hulandes, ministerio di minister Plasterk a informa nan cu, apesar cu lo bin un CAft, Cft na Corsou lo ta e instancia cu lo ehecuta e control real riba finansas di Gobierno di Aruba.

      • Den un entrevista cu minister Plasterk a haci cu NPO Radio 1 (Hulanda), sr. Plasterk ta bisa cu CAft lo por obliga Gobierno di Aruba pa sigui nan ‘consehonan’. Esaki ta indica cu no ta trata di simplemente 'asistencia’ of ‘sosten’ pa Gobierno logra un presupuesto balansa. Ta trata di un instancia financia door di Hulanda, tumando decisionnan cu Gobierno di Aruba tin cu ehecuta. Decisionnan cu normalmente un pais autonomo ta tuma su mes.

      • E protocol en cuestion ta bay mas leu cu menciona introduccion di CAft. Varios exigencia ta wordo menciona, cu Aruba lo mester tene su mes na dje. Por ehempel, Gobierno tin cu implementa recomendacionnan di Cft pa cu presupuesto 2015. Nota cu aki ta trata di Cft, no CAft.

      • Minister presidente Mike y Eman y minister Otmar Oduber a enfatisa cu CAft lo ta algo temporal. Esaki por lesa den articulo 12 di e protocol, cu ta menciona cu, ora Gobierno logra un balanced budget, Gobierno lo introduci un Begrotingskamer (in samenwerking met Nederland!) pa tuma over e supervicion financiero. Gobierno ta bisa di lo realisa un balanced budget na 2018. P’esey Gobierno ta referi na 2018 como fin di CAft. Tin duda si Gobierno lo logra pa 2018. Por ehempel, Fitch Ratings no ta kere cu Gobierno lo logra e meta di un ‘balanced budget’ na 2018. Di otro banda, e chens cu Gobierno logra esaki na 2018 probablemente lo ta mas grandi bou di supervision di Cft/CAft. Si nos asumi cu Gobierno lo logra, y cu e Begrotingskamer realmente no lo mina nos autonomia, ainda Gabinete Mike Eman lo a entrega parti di nos autonomia pa por lo menos cuatro aña.

      • Sr. Mike Eman indirectamente a admiti cu a entrega parti di nos autonomia. Den Parlamento (4 mei 2015) sr. Eman a bisa: “E ta un compromis cu nos a sera pa por sali for di e diferencianan di opinion, kiermen si tin critica ... riba e prome fase aki nos tambe ta reconose nos mes den e critica aki. Nos a sera un compromis pa nos por a resolve e tema aki, cu si ela keda di e forma cu e tabata bayendo, nos ta kere cu e inkietud y e daño cu ta haci ta mucho mas grandi cu trese e claridad. Pone den e contexto di nos autonomia, cu ta, na final ta nos mes ta bay dicidi nos mesun criterianan y nos mesun begrotingskamer ... y nos a pone un overgangsfase pa alcansa esey.” For di esaki por conclui cu Gabinete Mike Eman II a haci consessionnan cu, te na final ta bay resulta den un situacion autonomo den cua Aruba mes por dicidi riba su finansas.

      • Den un contestacion na ArenaPoliti.co na december 2014, lider di Fraccion AVP sr. Rene Herdé a declara cu tawata tin perdida di autonomia financiero pa e periodo di e KB pa aña 2014. Considerando cu e protocol ta stipula cu Gobierno mester implementa recomendacionnan di Cft e aña aki, lo ta probabel cu sr. Herdé tambe ta reconose cu e protocol ta ensera un perdida di nos autonomia financiero.
      • Esnan cu ta 'read between the lines' for di hopi tempo caba ta realisa cu Hulanda tin Gabinete Mike Eman na rudia. Ora Gabinete Mike Eman mes a puntra Cft pa investiga presupuesto, bo por conclui cu "nan mes" a puntra esaki paso sino lo a bin un otro KB. E protocol di 2 mei 2015 ta mustra similar den e aspecto aki. Ta un acuerdo acepta na rudia, mientras cu ta purba convence pueblo cu ta un logro pa celebra.

Asina tin mas punto cu ta haci ponencianan di prome minister Mike Eman tocante nos autonomia hopi cuestionabel. Tin un descrepancia substancial entre "nos lo entrega nos curpa pa bisa Hulanda, mundo, cu nunca bo ta bay kita un milimeter di e Status Aparte di e pais aki" y tambe bisa cu nos autonomia ta “sagrado”, pa despues ta “sumamente contento” cu un protocol cu ta entrega parti di Aruba su autonomia. Aruba su situacion mester ta hopi malo si nos mester ta contento cu parti di nos autonomia a wordo entrega. Hasta si ta pa un periodo di cuater aña.

A wordo insinua cu, considerando e posicion financiero di Aruba, e acuerdo ta e unico manera pa preveni un AMvRB, y un perdida di autonomia mas grandi y permanente. Si esey ta e caso, mandatarionan mester informa pueblo di esaki claramente y no pretende cu nan no a entrega un parti di nos autonomia, sigur pa mas largo cu un periodo di gobernacion. Sr. Mike Eman, cu sosten di otro ministernan y parlamentarionan di AVP, a crea un percepcion diferente cu entre otro e welga di hamber y ponencianan cuestionabel. Tambe ta importante pa corda cu Hulanda no lo ta den e posicion pa por impone y presiona Gobierno di Aruba exitosamente, si en berdad cos tawata bayendo bon na Aruba. A lo menos por wordo bisa cu e maneho di Gabinete Mike Eman I y II a perhudica nos Status Aparte y autonomia. 

Otmar Fb 01
NoticiaCla y 24ora a reporta cu minister Otmar Oduber a entrega un carta na prome minister Mike Eman, bisando cu “si gobierno di Aruba firma e acuerdo segun normanan di Hulanda, e lo entrega su retiro”
(NoticiaCla).
Despues cu a yega na un acuerdo, sr. Oduber a 
felicita pueblo cu e acuerdo aki, y a referi na 'defende autonomia'. Ta remarcabel cu sr. Oduber lo a bay for di un accion drastico (menasa di entrega su retiro), pa considera e protocol algo di celebra. Minister Oduber ta felicita esnan cu ta defende nos autonomia, siendo cu e acuerdo ta ensera un entrega di parti di nos autonomia.

Un otro politico cu tambe ta contento cu e acuerdo, ta lider di RED sr. Rudy Lampe. Compara cu ministernan Eman y Oduber, un di e diferencianan den su argumentacion ta cu sr. Lampe claramente ta expresa cu “ta berdad cu a sacrifica autonomia di Aruba”. Den opinion di sr. Lampe, “esaki tambe ta algo positivo”.

Tur hende ta liber pa forma y expresa su opinion tocante nos autonomia. Tin ciudadano cu ta dispuesto pa entrega (parti di) nos autonomia, y tin ciudadano cu no kier wak (parti di) nos autonomia bay perdi. Nos mester respeta opinion di otro. Y respet ta exigi sinceridad. Tambe di e dos politiconan cu mas hopi voto.


Klik aki pa lesa/download e protocol.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.