Perspectiva Independiente without background 001

Evelyn Wever-Croes (MEP): MEP ta cuestiona mal maneho di Minister Otmar Oduber

160326 chris evelyn dangui directiescheepvaart
NINGUN MOMENTO MEP A CUESTIONA ATA NI SU TRAHADORNAN. 

STA CRUZ -- Den ultimo dianan tur atencion ta riba un pleito interno den partido AVP. Un periodista manda pa lider di e partido Mike Eman ta den discusion cu un otro minister di e mesun partido.

"Nos di MEP a dicidi di keda afo di e pleito interno aki entre Mike Eman y Otmar Oduber, mescos cu nos a keda afo dia cu Otmar Oduber a core bai entrega su retiro. Aruba tin demasiado problema, pa nos dedica mas tempo na pleitonan interno cu no por wordo atendi pa motibo di falta di liderasgo den AVP.

Pero mirando cu minister Otmar Oduber no por a keda sin hinca MEP aden, nos mester reacciona. Minister Otmar Oduber a hasi como si fuera cu MEP ta acusa ATA di algo. Ta bon pa e Minister stop di hasi cos di mucha chikito, y stop di manipula. Ningun momento MEP a cuestiona ATA ni su trahadornan. 

TRAHADORNAN DI ATA TA INTEGRO
Nos sa cu trahadornan di ATA ta hendenan integro y ta traha duro den bienestar di nos turismo. Nos sa tambe cu e gran mayoria di hende cu ta traha na ATA no ta di acuerdo cu locual e minister ta hasi cu ATA y ta contra e mal maneho di e gobierno aki.

Locual nos ta cuestiona ta e abusonan cu minister Otmar Oduber ta hasi cu fondonan di ATA, pues nos enfoke ta e minister y su mal maneho cu abuso di placa di ATA.

FALTA DI TRANSPARENCIA
E minister a ganja tambe ora el'a bisa cu semper e ta transparente y e ta duna informacion na Parlamento. E minister NUNCA kier a duna cuenta di ningun di e festivalnan, ni e asunto di logo. Nunca e minister kier a bisa nos ken ta tras di tur e"deal"nan aki, y semper a bisa cu ta asunto interno y privacidad di e hendenan ta pone cu e no por duna nos informacion. Pero awor cu el'a declara publicamente cu e ta dispuesto di duna tur informacion, sigur nos lo hasi'e tur e preguntanan di nobo, pa e duna nos exactamente cuanto p-laca cual di su amigonan y sponsornan ta haya di tur e proyectonan riba instruccion di e Minister

POLITICA TA PA HENDE SERIO, NO PA MUCHA CHIKITO
Finalmente mi kier bisa e minister cu politica ta pa hende serio. E minister aki ta comportando su mes na un forma masha infantil ultimo lunanan, y esey ta un berguensa pa nos pais. Prome el'a ganja muri y ora el'a ripara cu ningun hende ta bin su entiero, el'a core retira su carta di retiro. Te dia di awe e no por a mustra nos den Parlamento su carta di retiro di 8 puntonan,ni cuanto biaha nos a puntre.

Awor atrobe e ta den un pleito interno, y e mester hinca MEP aden. Politica ta asunto pa hende serio, y cada ken mester carga bo responsabilidad. Minister Otmar Oduber mester sinja para straight den su sapato y no core bin sconde bou saya di MEP cada biaha cu e haya pleito cu su hendenan", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.