Durante e ultimo añanan, diferente acuerdo y negociacionnan a tuma luga entre Gabinete Mike Eman y Hulanda. Tin hopi indicacion cu e acuerdonan aki a habri porta pa ‘metemento’ di Hulanda den nos finansas publico, y manera ta conoci, negociacionnan a resulta den un aanwijzing (KB) cu a permiti CFT pa investiga presupuesto 2014. Recientemente Gabinete Mike Eman II mes a haci un peticion pa CFT investiga presupuesto 2015 tambe.
E investigacion di CFT riba presupuesto 2014 a resulta den varios recomendacion concreto pa cambionan den e presupuesto. Varios di e cambionan cu CFT a propone a wordo implementa. E pregunta ta surgi si pais Aruba a perde un parti esencial di su autonomia financiero. Algo cu despues di hopi lucha a ser logra na 1986.

ArenaPoliti.co a aserca tres politico pa haya nan contesta riba un pregunta al caso. E pregunta exacto: 'Den bo opinion, e negociacionnan y acuerdonan entre Gabinete Mike Eman (I & II) y Gobierno di Reino (Hulanda) tocante un Fiscal Council, CFT, y supervicion financiero en general, a resulta den un perdida parcial di Aruba su autonomia? (sea 'riba papel' of den practica) Dicon si / dicon no?'

Tur tres politico ta papia di un perdida di autonomia den un of otro forma, pero e contestanan ta hopi diferente.


Andin Bikker
Segun parlamentario y lider di PDR, sr. Andin Bikker, “Tempo cu a disolve Antiyas na 2010 no a papia di un rijkswet CFT pa Aruba, dus e hecho cu awor aki indirectamente Aruba ta conoce, links- of rechtsom, un of otro tipo di CFT a base di palabracionnan haci door di Gabinete Eman (I y sigur) II, e por wordo considera cu Gabinete Eman a entrega parti di nos autonomia di por hiba un maneho financiero-economico propio sin intervencion.”

Sr. Bikker ta sigui splica: “Gabinete Eman I y II a subestima e hecho cu den diferente parti di mundo e tema di disciplina fiscal ta na ordo di dia, incluyendo na Union Europeo, despues cu varios pais manera Cyprus, Spaña y Grecia a haya nan den problema financiero serio cu a costa hopi placa, y a afecta indirectamente e pagador di belasting Hulandes, ya cu Hulanda mester a yuda den e cuadro Europeo. Pues ora cu e situacion financiero economico di Aruba a empeora den apenas un periodo di Gobernacion bou di Gabinete Eman I, y e presupuesto 2014 a tarda, y pa colmo for di prome instante (tambe) a mustra di ta irealistico, no ta straño cu Reino Hulandes a keda insisti riba un of otro tipo di CFT, con cu kier yame, sea CFT, "Fiscal Council" of "Begrotingskamer".
Pues ta e mal maneho financiero-economico di Gabinete Eman I y II a duna apertura pa Reino Hulandes haye obliga di interveni, netamente pa preveni cu Aruba cay den un spiral di debe ireversibel, manera cu a pasa cu e paisnan previamente menciona.”


Booshi Wever
Segun lider di UPP, sr. Candelario ‘Booshi’ Wever, un minamento formal di nos autonomia a tuma luga. Y no for di awo, pero for di basta tempo caba. Sr. Wever ta splica: “Pa cualkier pais, bo autonomia financiero ta fundamental. Den e caso aki, na unda e gobierno di Mike E. for di basta tempo caba ta minando nos autonomia riba otro tereno tambe, awo cu e acuerdo recientemente sera, ta un minamento formal pasobra ni gobierno ni parlamento por tuma cualkier decision sin cu sea CFT of e Fiscal Council aproba esaki prome.
Esaki no ta implica cu nos [UPP] ta contra pa tin un organo asina, pero esaki mester a bin di nos mes y haci door di nos mes. Tipo di organonan asina ey ta pas den UPP su pensamento entorno di Good Governance.”

Contando di su propio experiencia cu Hulanda como minister, sr. Wever ta añadi: “Tempo cu mi tabata tin e honor pa sirbi Aruba como minister, mi a percura pa mi cumpli cu cualkier palabracion cu Hulanda, y Hulanda a haci mescos. Afspraak is afspraak. Den e caso actual ta mustra cu Mike E. mes a haci promesanan sin cumpli, dunando Hulanda espacio pa interveni. For di 2010 como parlamentario mi a adverti na hopi ocacion cu Mike E. ta entregando parti di nos autonomia, y cu nos mester ta mas cauteloso cu protocolnan y acuerdonan cu Hulanda. Lastimamente fraccion di AVP, en bes di controla loke tabata pasando, a apoya Mike E.”

Sr. Wever ta skeptico di e actuacion di Gobierno di Reino (lesa Hulanda) den e asunto aki: “Mi tin e impresion cu e gobierno Hulandes tin bastante informacion y sospecho di posibel actonan coruptivo cu ta y a tuma luga na Aruba y na unda posiblemente diferente minister den e gabinete di Mike E. lo ta involvi. Si esaki ta berdad, tin un wega sumamente maligno y contra tur regla di bon gobernacion ta wordo hunga door di e gobierno Hulandes tambe. Asina ta pone mas presion riba Mike E., te cu e mes ta pidi CFT bin investiga. Sin duda, gabinete Mike E. ta entregando parti di nos autonomia financiero.”


Rene Herdé
Parlamentario y lider di fraccion AVP, sr. Rene Herdé, ta di opinion cu Aruba a perde un parti di su autonomia pa e periodo di e KB pa aña 2014, pero no pa 2015: “Cu excepcion di e periodo di e KB pa aña 2014 den cua e presupuesto aproba door di Parlamento no a wordo firma pa bira ley y e CFT a wordo imponi, no tin perdida di "autonomia financiero". Awor aki no tin niun acuerdo entre gobierno di Aruba cu gobierno Hulandes riba supervision financiero den forma di evaluacion di presupuesto despues di 2015. Mi a compronde cu otro aña lo bay papia riba un forma di "coorperacion".”

Sr. Herdé ta continua cu un splicacion di un acuerdo pa un ‘Fiscal Council’: “Na october tabata tin un acuerdo entre gobierno di Aruba y di Hulanda pa e rol di "CFT di Korsou y Sint Maarten" na Aruba. Esaki ta poni den e Presupuesto Supletorio 2014. E ta ensera cu una vez cu e Fiscal Council ta funciona, CFT lo haya e rol di consehero di e Fiscal Council di Aruba. Esaki ta e acuerdo cu a yega na dje originalmente entre gobierno di Aruba y gobierno di Hulanda. Lamentabelmente gobierno di Hulanda a cambia nan posicion y awor no kier e acuerdo aki mas. Ta p’esey awor aki no tin un acuerdo pa e periodo despues di 2015.
Dicon? Finansa publico, no ta un tarea di Gobierno di Reino, manera poni den articulo 3 di Statuut, consecuentemente ta un tarea di e paisnan autonomo. Esey no a cambia pa Korsou y Sint Maarten tampoco apesar di e Rijkswet Financieel Toezicht. Mi no ta kere cu Hulanda lo bisa cu nan a entrega autonomia financiero na EU door di cu e CFT-Europeo ta conta pa Hulanda tambe. Nan ta yama esey parti di e acuerdo di cooperacion riba tereno financiero dentro di EU.”

Segun sr. Herdé, for di 2010 caba Hulanda tabata kier pa Aruba tambe participa den e Consesus Rijkswet Financieel Toezicht cu gobiernonan di Korsou y Sint Maarten a acorda entrante '10.10.10', pero gobierno di Aruba a nenga e proposicion aki.

Tocante aña 2015, sr. Herdé ta bisa cu “gobierno di Aruba ya for di october [2014] a sugeri pa CFT haci analisis y recomendacionnan riba e presupuesto 2015, pasobra no tur nan recomendacionnan a wordo inclui den e presupuesto supletorio di 2014. Awor aki no tin niun acuerdo entre gobierno di Aruba cu gobierno Hulandes riba supervision financiero den forma di evaluacion di presupuesto despues di 2015.”

Di e plannan actual di gabinete Mike Eman II, sr. Herdé ta bisa cu: "Gobierno di Aruba tin intencion di introduci un propio organo independiente (mescos cu RvA ta pa asuntonan huridico) pa analisa y conseha riba asuntonan di presupuesto / finansa publico. E organo aki lo mester wordo instala na fin di 2015 / comienso 2016. Cu esaki - y completamente dentro di e cuadra constitucional di Statuut - cu ta ensera cu finansa publico ta un asunto autonomo di paisnan - Aruba lo tin su propio organo di analisis y conseho fiscal independiente. Esaki ta e Fiscal Council cu ta wordo prepara cu ayudo y experticio di International Monetary Fund (IMF)."

Como ultimo remarke sr. Herdé ta añadi: “E unico forma pa Aruba perde algo di su autonomia financiero, ta si Aruba bay di acuerdo pa cambia Statuut y laga finansa publico bira un tarea di Gobierno di Reino. Esey no lo sosode facilmente, pasobra pa cambia Statuut, tur cuatro pais mester bay di acuerdo. Na Korsou y Sint Maarten awor aki ariba dje [tin] un malcontento grandi cu e Consensus Rijkswet Financieel Toezicht. E motibo ta e forma cu CFT ta traha: tanto e strategia limita y e normanan cu ta aplica.”

Imagen: E 'Fiscal Council' y e rol di CFT den esaki, poni den e presupuesto adapta/supletorio na oktober 2014.

Expresionnan haci den e articulo aki no necesariamente ta refleha opinion di ArenaPoliti.co