Dialuna pasa Fraccion di MEP a haci un peticion na Presidente di Parlamento pa yama un reunion publico pa asina Ministernan Sevinger y Eman responsabilisa nan mes na Pueblo riba e otorgacion y cambio di uso di tereno. Ta hopi ta kehonan cu ta bin dilanti di cuidadanonan cu no ta compronde dicon nan tin cu warda asina hopi aña pa por yega na remarke pa haya un tereno siendo cu tin otro hende cu hopi menos aña ta warda ta bira haya tereno promer cu nan. E veredicto di juez riba e boutique hotel Ocean Z y e otorgamento di mas di 3000 m2 na Roberto Rincon den solamente 5 dia, a pone cu Pueblo ta exigi un splicacion di e Ministernan concerni ya cu esakinan ta wordo considera como abuso di poder di Gabinete Eman.

Mrs and Mr Real Estate
E ta remarcabel cu net Minister Sevinger kende tabata yama e Minister di Infrastructura di MEP pa Mrs Real Estate, awe ta wordo enfrenta pa un veredicto di juez den cual ta bira bisto cu Minister Sevinger a abusa di e poder cu e tin como mandatario pa cambia destino di un tereno sin worry cu ley di zonificacion. Banda di esaki, despues cu Minister Sevinger largo tempo a tilda e ex Minister di MEP di ta haci corupcion cu tereno comercial dunando mayoria tereno na un solo comerciante, awe ta sali na cla cu Minister Sevinger den apenas 5 dia ta bay di acuerdo pa duna Roberto Rincon mas di 3000 meter cuadra di tereno commercial na Balashi. Awor ta ki diferencia tin? Acaso esaki no ta corupcion? Un cos ta sigur, e manera di anda aki di Minister Sevinger ta hacie merecedor di e titulo di Mr Real Estate pa AVP. Y pa bienestar di e Pueblo aki, lo ta bon pa Mr y Mrs Real Estate duna cuenta na Pueblo ta con nan a maneha cu tereno y cambio di destino di tereno na nos Pais.

Reunion publico a wordo pidi
Den nos peticion na Presidente di Parlamento, nos a enfatisa cu ta un reunion publico ta wordo pidi, ya cu solamente den un reunion publico Parlamento por debati y bin cu mocionnan pa vocifera e deseo cu e Pueblo kier mira Gobierno cumpli cune. Nos no kier mira ripiticion di e wega politico cu a ser haci, na unda cu nos ta pidi reunion publico conforme e Ley di Reglamento di Ordo, pero Presidente di Parlamento riba su mes y contra ley ta bira yama un encuentro cu e minister na su lugar. Nos ta spera cu e reunion publico aki pronto por tuma lugar.

19 januari 2016

Expresionnan haci den e articulo aki no necesariamente ta refleha opinion di ArenaPoliti.co