Perspectiva Independiente without background 001

MEP: MEP a manda di 4 peticion pa reunion publico tocante otorgamento di tereno desde januari

FraccionMEP23
Ya dia 18 di januari 2016 fraccion di MEP a hasi un peticion pa un reunion publico pa atende minister Benny Sievinger riba e escandalonan entorno otorgamento di tereno. E reunion aki no a wordo yama ainda y pues e fraccion a manda un recordatorio dia 23 februar, un otro dia 14 maart, un otro dia 11 mei y awe e di 4 recordatorio. Segun reglamento di orden di Parlamento, un reunion asina mester wordo yama dentro di 30 dia! Kiko ta e motibo cu parlamento ta viola reglamento di orden, y no ta yama e reunion, no ta conosi.

Ultimo lunanan minister Bennie Sievinger ta e blanco di escandalo cu tereno. Tereno cu el'a duna na su campañadornan, tereno cu ela duna na esnan cu a financia su campaña, terenonan duna na rumannan di minister, terenonan duna na doñonan di partido AVP!

Na Aruba tin un negoshi di tereno den cual miyones y miyones di florin ta draai. E sistema ta traha asina.

Minister Benny Sievinger ta aproba peticionnan na granel di un grupito di hendenan hopi serca di dje. E hendenan aki ta lanta cantidad di compania, y cada tereno nan ta hinca den un compania asina. E gastonan total di e hendenan di Sievinger no ta hopi, talves 2 mil florin pa haya e tereno y lanta e compania. Y e ora e negoshi mes ta cuminsa, pasobra nan ta bende e tereno y e compania na inversionistanan di Venezuela, Merca y otro pais, tin biaha hasta pa Af. 2.000.000!
Den un caso asina nan ta hasiendo un ganashi di Afl. 1.800.000. Un miyon y ocho cien mil florin! Remarcable ta cu minister Sievinger ta aproba e peticionnan di esnan serca di dje mesora, sin perde mucho tempo, pa asina e placa drenta facil y liher.
Esaki ta un acto castigable, pasobra ta prohibi pa specula cu propiedad di pueblo y hasi ganashinan asina extravagante, mientras tin 10 mil cuidadano ta wardando 10 aña of mas pa haya un tereno.
E ganashi aki no ta wordo deposita riba cuentanan di banco na Aruba, pasobra ta mucho obvio. Nan ta deposita e placa aki riba cuenta di banco na Merca. Cu esey nan ta cumpra yen di cos di luho, manera condominio na Merca pa yiu biba aden.

Tur esaki ta pasa bou di nanishi di autoridadnan na Aruba, pero autoridadnan no ta actua. Sea nan ta mortalmente na soño y no ta interesa den combati corupcion, of sea nan a haya instruccion di gobierno pa no investiga y no actua, of sea nan ta complice den tur e corupcion aki. Cualquier cu ta e caso, e corupcion aki lo no dura mucho tempo mas, pasobra ta cu man duro husticia lo baha riba tur e coruptonan cu ta specula cu propiedad di pueblo, una bes cu gobierno cambia, y e biento fresco di husticia cuminsa core cu tur e aire putri di corupcion di AVP. 
160707 MEP reminder peticion reunion publico tereno

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.