Perspectiva Independiente without background 001

Booshi Wever (UPP): Peticion urgente na presidente sra. Lopez-Tromp pa Parlamento bini cu un mocion pa un “feiten-onderzoek” of “forensisch onderzoek” den asunto di IMSAN y Dump

UPP01
Nos tur por a scucha con den e reunionnan andando den Parlamento, unda ta trata principalmente e gastonan extra pa e sala(nan) di operacion di hospital, cierto parlamentarionan a haya bon pa – di tantisimo biaha – insinua cu cosnan lo a bay robez, tanto den IMSAN como na Dump, den e periodo cu ami tabata minister pa entre otro Salubridad y Medio Ambiente.

Harta di tur e insinuacionnan, specialmente esunnan cu ta ser vocifera den Parlamento, unda no solamente parlamentario, pero tambe e propio minister Sevinger, ta acusami “a todo placer” di accionnan cu lo no por a weita luz di dia, sin cu nan socio, presidente di parlamento, Marisol Lopez-Tromp, ni sikiera ta hala nan atencion cu nan no por referi na un persona si esaki no ta den Parlamento, corda pa e tahanan pa sigui!

Tampoco Marisol a cordanan cu e asuntonan aki NO tabata forma parti di e agenda at all. Di e manera aki, un biaha mas Marisol ta faya barbaramente como Presidente di Parlamento.
Pues Marisol a permiti tanto e minister como parlamentario(nan) pa lanza acusacionnan contra di mi persona, a sabiendas cu mi no tabatin e oportunidad di defende mi mes “à la minute” y "ter plaatse".

Cu mi carta fecha 2 di maart 2015 dirigi na Presidente di Parlamento (copia adhunto), mi ta sugeri, mas bien mi ta URGI su persona pa e usa su posicion pa haya parlamento presenta, y acepta un mocion cu ta instrui pa un "feitenonderzoek” of un “forensisch onderzoek" tuma lugar tambe den e dos proyectonan aki.

Mi NO tin nada di sconde! Mi consenshi ta limpi! E "feitenonderzoek” of  ‘forensischonderzoek" den cada proyecto lo demostra cu no tin nada cu a bay robez.
Den e caso di dump, esaki lo confirma e – por lo menos 6 – sentencianan di Huez, hasta te den Hoger Beroep. No ta algo usual, pero mester bin un fin na e insinuacionnan aki. Por fabor no "chicken-out" awor.

Pa e "feitenonderzoek” of  ‘forensischonderzoek"-nan por ta completo, esakinan mester cubri e periodo for di tempo cu mi persona a cuminza carga responsabilidad pa ambos, pero TE CU AWOR AKI, AÑA 2015!

Laga e feitenonderzoek den IMSAN mustra tambe kiko mi a laga atras fin di october 2009, tanto na proyectonan como na material. Lague mustra kiko e gobierno aki a haci por ehempel cu e material, e aparatura, etc.
Laga e feitenonderzoek na dump na Parkietenbos mustra unda tabatin sabotahe, por ehempel ora cu a tira piezanan pisa di auto den e machine!

Mi ta sugeri pa – mas especifico pa loke ta trata e proyecto na dump – e “feitenonderzoek” of “forensisch onderzoek” considera tambe tur e corespondencia cu tabatin riba e proyecto aki; for di principio na unda for "day one" AIB y FDA tabata involve; alabes mi kier referi aki entre otro na e diferente casonan dilanti di mesa berde, cu ya mi a menciona anteriormente, unda na 6 ocasion, Huez a dicta cu NO tabatin nada cu a bay contra ley.

Pa ta completo: mi kier asumi cu - y si mi ta robez, mi ta demanda pa - den e "feitenonderzoek" riba e asunto di hospital, esaki lo “cover” henter e periodo, pues por lo menos for di e invitacion, incluso e “bestek”, acompaña pa “onderliggende stukken”, na companianan pa nan participa den un destaho publico pa dicho expansion y renobacion, te na otorgamento di e proyecto na Bermello y Arrellano.
Mi a sugeri (lesa: URGI!) pa den e “feitenonderzoek” den e caso di hospital, bin tambe un aclaracion y splicacion di sr. Frensel Giel, director di A.I.B., encuanto e motibo di su buelta di 180 grado respecto e tereno unda e hospital ta situa.

Lagami splica: den su rapport di juni 2007, sr. Frensel Giel/A.I.B. ta condena e tereno unda e hospital ta para, como completamente inadecua pa un hospital; cu cambio di gobierno na final di 2009 A.I.B. no tabatin ningun objeccion mas contra e sitio. Den e situacion di 2007 NO a bini ningun cambio toch?

Awor cu ta resulta cu e kelder di e hospital ta keda yena cu “grondwater”, y cu ta casi imposibel pa saca e awa, ni cuanto truck pone traha, e pregunta ta, si sr. Giel a basa su posicion di juni 2007 riba su conocimento di e condicion di e tereno, pues cu sr. Giel tabatin motibonan valido pa a condena e tereno na juni 2007!

Copia di e carta pa Marisol a bay tambe pa e lidernan di fraccion den Parlamento, cu e intencion cu nan tambe lo pusha pa e mocion pa e "feitenonderzoek” of “forensischonderzoek"-nan aki di berdad wordo lanza y aproba, y ehecuta mas pronto posibel.
Palabra ta na Marisol y na Parlamento!

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, maart 3, 2015

Anexo: copia carta pa presidente di Parlamento

Imagen Imagen

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.