Perspectiva Independiente without background 001

Expectativanan pa e reunion historico tocante ley di supervision

Parlamento sala
Dia 27 di augustus 2015 Parlamento di Aruba lo trata e ley di CAft, cu ta regla supervision financiero di Hulanda riba e finansas di pais Aruba.

For di hopi expresionnan haci door di parlamentarionan di MEP y PDR, tin e espectativa cu tur e parlamentarionan aki (8) lo vota contra e ley. Diasabra (2 augustus 2015) lider di MEP Evelyn Wever-Croes a anuncia un accion 'Awor t'e Ora' y hunto cu su coleganan di partido a haci un yamada na Pueblo pa presencia e reunion en cuestion (paden y pafo di Parlamento). Segun MEP e minsternan di Gabinete Mike Eman II mester entrega nan retiro. Den un otro comunicado sra. Wever-Croes ta splica dicon, segun MEP, e ley di CAft no ta bon pa Aruba.
Algun lider di sindicato tambe a anuncia cu, si e ley di CAft wordo aproba, lo tin accion(nan) na caminda.
Pa loke ta trata e 13 parlamentarionan di AVP, ta menos obvio con cada un lo vota. Den un comunicado di lider di fraccion AVP Rene Herdé por lesa cu fraccion AVP no a caba di fiha nan punto di bista riba e ley. Na mesun momento e comunicado tambe ta mustra di ta duna e fundeshi pa argumenta aprobacion di e ley. Si sr. Herdé yega na e conclusion cu e lo aproba e ley, esaki no kiermen cu tur parlamentario di AVP tin cu haci mescos. Cada parlamentario, sin importa e fraccion y color politico, ta liber pa vota segun su propio consenshi, y cada un ta carga tur responsabilidad pa su voto individual den Parlamento.

Bienestar di Pueblo vs. bienestar di partido vs. bienestar propio
Hopi ta esnan cu no tin fe den nos Parlamento pa motibo di e aparencia di ta un stempel-parlement. Hopi tin e espectativo cu parlametarionan di AVP no lo tuma un decision basa riba e bienestar di Pueblo, pero lo vota na bienestar di nan partido/Gobierno, y/of nan propio posicion como parlamentario, y/of nan futuro politico. Esaki pa motibo cu revocacion di e ley di CAft por tin consecuencianan negativo pa AVP. Na final no lo ta e speculacionnan aki cu ta conta, pero e decision cu e parlamentarionan mes tuma.
Klik aki pa lesa tocante e desbalansa entre Parlamento y Gobierno, cu por ta un base principal pa un stempel-parlement.

Tactica
Kisas ta wishful thinking, pero ohala parlamentario- y ministernan keda al caso durante e reunion publico y debati seriamente riba algo asina impactante pa nos pais. Esnan cu ta sigui reunionnan publico di Parlamento pa hopi tempo por ripara varios tactica cu ta wordo usa pa desvia for di e esencia di un ley:
  • Desviacion cu atakenan personal y/of irelevante; si ta asina necesario pa haci atakenan personal, por haci’e un otro caminda. Den Parlamento parlamentarionan tin cu representa y defende Pueblo, y controla Gobierno, mientras cu ministernan tin cu responsabilisa nan mes na Parlamento y duna contestanan completo y al caso. Presidente di Parlamento por instrui parlamentario- y ministernan pa keda al caso y no desvia.
  • Evita papia di cierto aspecto esencial, den e caso aki e perdida di autonomia; e aspecto di autonomia ta crucial. Aceptacion di e ley lo mester di hustificacionnan serio pa cu e perdida di autonomia. No por ignora e aspecto aki.
  • No hiba palabra, no haci pregunta; pa un ley asina importante, ta di spera cu tur parlamentario haci uso di e instrumentonan na nan disposicion pa haci nan trabou debidamente y representa Pueblo dignamente. Preguntanan por wordo haci na e ministernan, y mester crea y participa na un debate sano. Tambe mester splica y hustifica nan decisionnan, pa Pueblo por analisa y saca nan propio conclusion. No ta por nada cu e ta un reunion publico.
  • Exagera y/of no papia e berdad; Pueblo kier e berdad. Exagera loke ta bon of malo, no ta contribui na e meta di e reunion, y ta un mal uso di e tempo limita cu cada parlamentario ta haya pa hiba palabra.
  • Culpa otro; e chens ta grandi cu nos lo scucha hopi di pasado. Na hopi ocasion ministernan y parlamentarionan di AVP ta culpa Gabinete Oduber 3 y 4 (2001-2009) pa loke no ta bon awo, y parlamentarionan di MEP ta defende y/of elogia Gabinete Oduber, y/of bay mas leu y papia di Gabinetenan di Henny Eman prome cu 2001. Tambe ya caba miembronan di AVP ta culpa MEP di a percura pa Cft supervisa Aruba (si un gobierno cu 13 asiento no por para un partido den oposicion cu 7 asiento di “bin cu Cft”, algo no ta cuadra). Lo ta bon si ministernan y parlamentarionan no para culpa otro, y enfrenta e realidad di e ley di CAft.
 

Klik aki pa lesa/download e ley di CAft , memorie van toelichting, conseho di Raad van Advies y mas documeto relaciona cu CAft.
Klik aki pa lesa/download e protocolnan relevante cu Gabinete Mike Eman I y II a firma cu Hulanda.
Pa mas informacion, klik pa lesa: 'Aruba mester ta contento cu CAft?' y 'Parlamento lo tuma decision historico pa cu Aruba su autonomia'.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.