Parlamento ta tratando den e dianan aki e presupuesto di 2015. Minister Paul Croes mester a defende su maneho dialuna y diamars ultimo. No tabata facil pasobra e integridad di e minister a keda cuestiona severamente y e papel cu ela hunga den otorgamento di permisonan.

Un tema cu a resalta tabata e tantisimo excepcionnan cu e minister ta duna pa facilita permisonan. Ta trata di posicionnan cu tin hopi hende na Aruba cu por hasi e trabounan.
Pa e posicion di SECURITY tin 22 hende registra na DPL, pero asina mes minister Paul Croes a duna cantidad di permiso NOBO pa hendenan cu no ta na Aruba.
No a hasi caso cu 22 hende ta buscando trabou, pero a dicidi di laga mas hende drenta nos pais. Den e 22 hendenan registra na DPL tin varios naci na Aruba y den exterior, pero cu tin hopi anja bibando na Aruba y ta buscando trabou desesperadamente.
E unico motibo cu e minister a duna ta cu ta hende di cierto expericio cu no tin na Aruba. Y cu si tin hende cu tin e experticio ey, e hendenan ta floho y no ta di confia. Tambe mucha muhernan jong cu a inscribi pa traha den tienda, pero e minister ta sigi duna permiso pa hendenan bin di afo. Mescos pa hardinero, pa drecha tire di auto, etc.Tin un rapport di SER "Arbeidsimmigratiebeleid & Werkloosheid" di november 2014 cu tambe ta expone e practicanan aki cuestionable di minister Paul Croes.

Tur esaki a pone cu Fraccion di MEP den Parlamento a dicidi di pidi Algemene Rekenkamer pa hasi un investigacion, pasobra e minister ta viola su propio reglanan. Pa hasi e investigacion aki no mester sosten di mayoria den Parlamento.Tambe lo pidi Ministerio Publico pa hasi un investigacion, pasobra e fiesta di permiso aki mester caba na bon of na malo.

Expresionnan haci den e articulo aki no necesariamente ta refleha opinion di ArenaPoliti.co