Tin dos aspecto clave cu ta duna mi confianza pa loke ta e “Afspraken tussen de regeringen van Aruba en Nederland over de openbare financien van Aruba” di 2 di mei ultimo. Ta papia di “structureel onafhankelijk toezicht” y den e “Nadere afspraken” ta clave e poder di e Minister di Asuntonan di Reino na Den Haag. Mirando cu tanto e rapport di IMF como esun di Cft a menciona cu ta bai dura un generacion pa yega na un balanced budget, e 'financieel toezicht' aki riba Aruba no ta bai ta te 2018 sino ta bai ta algo permanente, independiente y structural. Y ta un autoridad externo ta bai tin control loke tambe ta positivo. Laga nos ta franco, nos gobernantenan a demostra di tin man los, y nos Parlamento ta un stempelparlement cu no por mara man di nos politiconan.

Ta berdad cu a sacrifica autonomia di Aruba, pero esaki tambe ta positivo. Nos ta biba den un otro mundo cu tempo di Betico. Mi no a conoce Betico personalmente, mi ta di un otro generacion y nos no por sigui cu e mesun receta di Betico. Tempo di Betico tabata existi e Muro di Berlin y ainda no tabata existi Union Europeo. Awendia Hulanda ta parti di Union Europeo y ta wordo supervisa financieramente pa Brussel, Hulanda tambe a perde autonomia. Ban probecha di nos lazo cu Hulanda pa awor nos risibi supervision financiero di Hulanda cu ya tin experiencia cu esaki. Ta trata di placa di pueblo y control externo riba con ta gasta placa di pueblo ta algo sumamente positivo.

Nos a caba di celebra en grande na Aruba e 200 aña di Reino Hulandes. Ban saca provecho di nos relacion cu Hulanda. Ban stop di culpa otro ta ken a causa mas debe, ban probecha e acuerdo di 2 di mei pa haci un restart di Aruba y mira pa futuro. Hopi pregunta mi a haya ta dicon net awor Puerto Rico a bai over na legaliza cannabis medicinal como prome paso. Pasobra e ta preparando pa e apertura di Cuba awor cu American Airlines a anuncia vuelonan diario pa Cuba y Puerto Rico cu razon tin miedo cu su cambernan di hotel lo keda bashi. Nos a premira esaki y pesei nos a propone pa haci Aruba un cannabis and gay friendly island y evita cu nos hotelnan keda bashi awor cu e boom turistico di Cuba ta den porta. Nos a kier a saca bentaha di e relacion di Aruba cu Hulanda, pasobra Hulanda tabata e prome pais na mundo cu a legaliza de facto cannabis y e prome pais cu a legaliza gay marriage. Pesei Aruba tin un gran bentaha riba e otro islanan pa capta e mercado turistico nobo aki dor di propaganda e isla aki como e Amsterdam den Caribe.

Ban restart Aruba despues di e acuerdo di 2 di mei, ban probecha di nos relacion cu Hulanda. No tin otro alternativa pa Aruba cu diversifica nos mercado turistico. E papiamento di Aruba como hub, of como centro di energia alternativa, of reapertura di refinera, tur esei no ta realistico, ta puro storia di fantasia. Turismo ta nos unico pilar. Pero nos no por keda haci business as usual cu nos industria turistico awor cu American Airlines a anuncia vuelonan diario pa Cuba. Si no bin cambio den nos mercado turistico mi ta premira cu nos hotelnan lo para bashi y e ora ni placa lo tin pa wordo supervisa. 

Expresionnan haci den e articulo aki no necesariamente ta refleha opinion di ArenaPoliti.co