ORANJESTAD- Minister Koenders di Asuntonan Exterior di Hulanda tabata na Aruba pa un encuentro cu Gobernador di Aruba sr. Refunjol, cu Prome Minister Eman, cu Presidente di Parlamento sra. Lopez-Tromp y algun otro instancia y instituto. Den oranan di atardi Koenders a atende e ceremonia na e monumento di guera pa conmemora esnan cu a muri pa nos libertad. Despues hunto cu Prome Minister Eman el a biaha pa Corsou pa eynan reuni cu colega Ministernan riba asuntonan vigente. Koenders a bisa di ta haya cu e relacion entre Aruba y Hulanda ta bon y siendo na Aruba e pensamento ey a wordo confirma un bes mas.

Minister Koenders e enfoca riba e echo cu como Reino mester pone prioridadnan hunto riba tereno di Asuntonan Exterior, principalmente den e region aki. “Tin hopi cos ta tumando lugar den e region unda Aruba, Corsou y Sint Maarten – e partinan Caribense di Reino, ta situa. Mi ta pensa aki riba e desaroyonan na Colombia, e deliberacionnan di paz cu ta tumando lugar, desaroyonan na Venezuela y e  cambionan grandi na Cuba. Tur esaski ta nifica desaroyonan tanto riba tereno politico como economico. Oportunidadnan nobo, pero tin bes tambe riesgonan nobo. Como minister di Asuntonan Exterior, cu ta un responsabilidad di Reino, mi mester scucha loke ta wordo mira como e puntonan di mas importante.” Puntonan, cu segun Koenders, mester wordo incorpora den un strategia conhunto den loke Aruba kier: un hub entre e continentenan.

Riba iniciativa di Camara di Comercio un delegacion comercial di Aruba ta biaha pa Cuba otro luna y mas leu den aña un delegacion Hulandes ta bay eynan. E siman aki ainda Koenders tambe ta bay Cuba. Riba e biahe ey e tabatin e siguiente comentario. “Mi ta kere cu no ta solamente Aruba y Hulanda, pero cu ta masha hopi otro pais na mundo kier bay Cuba. Mi ta bay eynan como Minister di Asuntonan Exterior. Den e caso di Cuba ta importante pa gana confiansa, pa enforsa e relacionnan politico, percura pa tur e iniciativanan economico ta wordo bon encuadra y pa wak con Cuba mes ta mira e reformanan actual.”

Koenders a bisa cu e por imagina su mes cu Aruba tin conocimento riba tereno di turismo y sigur otro terenonan tambe cu ta interesante pa Cuba y aki no mester ta rival di otro, pero busca e miho strategia den e caso aki hunto cu un pais cu tin intencion pa den un tempo cortico bin cu reformanan. “Central den tur esaki ta pa wak kico ta loke nan mes kier na Cuba.” Na final Koenders a bisa cu ta claro cu resultado di su biaha pa Cuba lo wordo comunica cu Aruba entre otro pa asina e delegacion comercial por haya mas informacion cu por yuda nan den e mision pa Cuba. 

Expresionnan haci den e articulo aki no necesariamente ta refleha opinion di ArenaPoliti.co