Parlamento diaranson a trata presupuesto di ministernan di enseñansa y infrastructura hunto. Lider di Fraccion di MEP Evelyn Wever-Croes den su presentacion a enfoca hopi riba e protocol firma dia 2 di mei, y kiko e ministernan tin pensa di hasi pa cambia, pa asina cumpli cu e exigencianan di e protocol. Pasobra Mike Eman a firma e protocol, pero cu esey tambe a pone cu tur e recomendacionnan di CFT mester wordo implementa. Sin e cambionan aki, ta problema nan ta busca atrobe cu Hulanda. Aparte di esey sra. Wever-Croes a elabora tambe riba e tantisimo problemanan den e ministerio di enseñansa. "E ministerio ta na candela, y e minister, en bes di busca solucion y trese pas, ta para WRONG and STRONG. Pa colmo awe un hues imparcial a duna veredicto contra minister Hooijboer-Winklaar cuestionando con e minister a duna "Ensure-To-Study" e contract pa studiantenan na Hulanda. Tur esaki ta motibo pa e minister tene honor na su mes y tuma su retiro", segun Evelyn Wever-Croes.

Pa loke ta Ministerio di Enseñansa, Parlamentario Besaril a lansa un total di 3 pregunta critico pa sra. Hooyboer: 1. Con a para cu e problematica di Vak Aanbod y Profielnan di HAVO/VWO, enbista cu tin hopi mayornan Y alumnonan cu ta masha preocupa cu nan futuro como studiante una bez cu nan termina na estudio y kier sigui cu un estudio avanza na Hulanda. 2. Con a para cu e problematica di aansluiting MAVO - HAVO. Tin hopi alumno y mayornan preocupa cu e punto aki enbista cu ta parse un cos awor cu ta cu puro "9 cu 10" bo mester slaag pa por tin un chens di bai di MAVO pa HAVO. 3. Mayornan cu tin nan yiu na Colegio Pariba ta preocupa cu e rumornan cu e enseñansa duna na e instituto aki ta di menos calidad cu Colegio Arubano (Playa) pa motibo cu no tin suficiente docente na nivel 1e graads na Colegio Pariba. E mayornan tin hasta miedo cu den un futuro nan yiunan lo tin problema cu nan diploma mañan.

Parlamentario Chris Romero a pone enfasis riba ciclo basico y e normanan cu a wordo ahusta pa por wordo acepta na Colegio. E parlamentario a declara lo siguiente : “For di experiencia nos sa cu e cambio di ciclo basico dos pa ciclo basico avansa uno no ta esun di mas apropia. Por ehempel e vak Natuur & techniek ta sluit aan cu e vaknan den ciclo avansa. Hopi ta di opinion cu lo ta bon pa split e vak Natuur & techniek den e vaknan natuur y scheikunde hunto y biologie apart. E tin su ventaha pasobra e ora ey den 3de bo lo haya e muchanan mas prepara pa e vaknan ey”, tawata palabranan di parlamentario Romero.

Expresionnan haci den e articulo aki no necesariamente ta refleha opinion di ArenaPoliti.co