Director di asuntonan maritimo di Hulanda impresiona cu Maritiem Overleg Platform na Aruba  

Hulanda conhuntamente cu e 6 otro islanan den Caribe cu ta forma parti di Reino Hulandes, a reuni extensamente durante e Maritiem Overleg Platform (MOP) cu a tuma lugar siman pasa, cual ta un reunion cu ta tuma lugar anualmente. A reuni riba topiconan cu ta regarda asuntonan maritimo, pero tambe riba aspectonan legislativo. Leynan di Scheepvaart ta  leynan di Reino y pesey mes ta asina importante pa tur e partnernan cu ta involucra sinta hunto pa delibera riba situacionnan cu ta funcional den Caribe y tambe ahustenan di ley cu mester tuma lugar  pa por implementa esakinan pa e islanan.

Sra. Gijsbers a comenta cu pa e ultimo 2 aña a conoce un mehoracion di relacion entre Hulanda y Aruba cual mester sigui mantene. Intencion ta pa continua cu e Twinings Project, pero pa involucra tambe e otro partnernan den Reino.  Kier sigui cu e inspecionnan adecuado y desaroya mas personal pa por eherce e tipo di trabounan aki profesionalmente.

E director ta mira cu Aruba tin un futuro positivo pa cu e desaroyo maritimo. E rapport di futuro maritimo ta ilustra diferente plan manera por ehempel registracion di barconan. Gijsbers ta mira complicacionan cu tur e exigencianan stipula, pero na mes momento e ta kere cu un bon maneho di Directie Scheepvaart Aruba, lo genera fondonan pa economia di Aruba. E ta mira un bon potencial pa nos isla den esaki.

Como isla, aviacion ta importante pero tambe e aspecto maritimo y conhuntamente lo percura pa un situacion maritimo halto den seguridad, pero tambe teniendo na bista nos medio ambiente. Mester percura pa no daña e ecosistema di nos awanan.

E MOP tabata uno cu tabata hopi positivo pa nos isla y Minister Otmar Oduber a keda sumamente satisfecho cu esaki, mirando e posibilidadnan grandi cu ta presenta pa desaroyo e sector maritimo di Aruba.

Expresionnan haci den e articulo aki no necesariamente ta refleha opinion di ArenaPoliti.co