Perspectiva Independiente without background 001

Evelyn Wever-Croes (MEP): Ainda minister De Meza no a contesta Parlamento tocante su "deal" di belasting

Evelyn17
ORANJESTAD – Durante conferencia di prensa di MEP lider di MEP a duna di conoce cu ainda minister Mike de Meza no a contesta Parlamento tocante e “deal” di belasting cu el’a haya.

“Ya ta dos siman caba cu Parlamento a manda pidi e Minister pa duna cuenta di e rebaho di 65 mil florin di belasting cu el’a haya pa su compañía, hustamente tempo cu e tabata minister di finansas. Mi a cuestiona esaki varios biaha durante tratamento di presupuesto, pero e minister no a hasi caso. Despues ma cuestiona atraves di un carta por escrito. Tampoco el’a reacciona. Despues prensa Hulandes a publica riba e deal cuestionabel aki, y e ora e minister a rabia y insultami yamami pa porco, pero asina mes, te dia di awe ainda e no a contesta Parlamento riba e preguntanan cu mi a hasi na su persona tocante e deal di 65 mil florin.

Mi ta sigi insisti pasobra mi no ta haya ta husto cu cuidadanonan humilde y di edad ta wordo persigi pa debenan di belasting atrasa y cu a caduca caba, mientras pa colega minister si por duna rebaho di 65 mil florin SIN un base transparente. Mi sa cu paga belasting ta deber di nos tur, y cu cobramento di belasting atrasa ta un deber di e minister di finanzas, pero no ta husto cu e ta cuminsa cobra cerca nos pensionadonan cu apenas por biba di nan pensioen, anto di otro banda ta duna nan amigonan miles y miyones di florin na rebaho di belasting.  Aruba merese mihor, nos pueblo merese un maneho di cobramento di belasting mas husto. Ademas, Aruba merese un gobierno integro y transparente, y no gobernantenan cu ora nan rabia ta insulta hende, y keda sin duna cuenta na Parlamento. Laga esaki ta un senjal pa minister de Meza y tur e periodistanan cu ta skibi p’e, insultami cuanto cu bo kier, esey ta bisa mas di boso cu e ta bisa dimi, pero mi lo keda insisti te ora mi haya contesta riba mi preguntanan”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.