AVP ta sigui busca reapertura sin sera porta pa otro desaroyo

Diripiente e partido MEP kier presenta su mes como e partido cu kier reapertura di e refineria na San Nicolas. Shete aña pasa nan a preciona pa haya mas placa te sera e refineria. Cuatro aña pasa MEP a bay contra di e reapertura di e refineria. E pregunta ta pakico MEP kier e reapertura di e refineria awor? Ta pasobra tin e posibilidad grandi pa un desaroyo economico completamente nobo na San Nicolas cu MEP no kier wak sosode bao di gobierno di AVP? Pakico net awor cu e mercado di crudo y rafinamento di petroleo ta asina malo rond di mundo, cu MEP ta asina na fabor. MEP kier pa e refineria no habri pero djies stroba otro desaroyo na San Nicolas mas largo posibel? MEP y PDR a bisa cu nan tin mas cu 7 compania cu kier cumpra of habri e refineria, pero cada biaha cu bisa nan pa presenta e companianan, nan ta keda keto. Awor MEP y PARA ta bisa cu nan tin otro compania cla pa cumpra y habri e refineria. Pero unda e compania ta? Bo ta kere cu e doño di e refineria no kier haya mas cu 500 miyon dollar pa e refeneria cu ta sera? Pakico MEP y PARA kier forsa pa envolve e americano English den e asunto aki? Kico ta e "wega" cu MEP kier hunga cu interes di PUEBLO? Tur e preguntanan aki y mas PUEBLO kier sa di MEP y PDR.

DESAROYO DI SAN NICOLAS
Pa AVP e desaroyo di "pariba di brug" ta loke ta importante. Pesey a haci tur lo posibel pa habri e refineria ya na 2011. Y a logra! Pesey despues cu e refineria a bolbe sera, a bay negocia cu PDV/Venezuela, PEMEX na Mexico, Petro Brazil na Brazil, cu PetroChina y PDVSA, cu Colombia y Trinidad, cu companianan grandi na Merca. Tur cu e meta pa habri e refineria. Pero mientrastanto gobierno di AVP tambe a cuminsa traha riba alternativanan pa desaroyo di San Nicolas. Ta den e cuadro aki tambe mester wak e construccion di e GREEN CORRIDOR entre Playa y San Nicolas. Mester di desaroyo economico pariba di brug. Si no ta e refineria, anto mester haci algo otro. Pero no por para keto sin haci nada. No mas!

CONDICIONNAN
Pa reapertura di e refineria AVP ta haya cu mester fiha un serie di condicion pa sigura cu e refineria ta keda habri pa en todo caso mas cu 10 aña y cu Aruba y San Nicolas en particular ta beneficia didje. Kier men cu no ta cu "ken cu ta" ta bay cuminsa un aventura cu ta fracasa y laga Aruba atrobe den problema. Pesey e compania cu nos scohe pa habri e refineria cun'e mester tin experiencia den opera un refineria y maneha compra y benta di petroleo riba mercado internacional. E mester ta un compania cu mester tin su propio petroleo of ta sigur di un fluho constante di petroleo pa e refineria di Aruba. E mester tin e placa pa renoba y opera e refineria den forma eficiente y sigur pa e trahadornan. E mester ta un compania cu ta emplea trahadornan di Aruba y no ta cuminsa cu exigi pa centenares di trahado bini di afo. Esey ta algun di e condicionnan cu partido AVP ta considera necesario.  E proposicion cu sr. English a haci pa trece "venture capitalists", esta hende cu tin hopi placa y cu kier gana mas placa so, no ta acceptabel sin cu cumpli cu e otro condicionnan pa garantisa continuidad. Pa AVP desaroyo di San Nicolas ta loke ta conta. Cu of sin e refineria. Esey ta e meta di AVP.

Expresionnan haci den e articulo aki no necesariamente ta refleha opinion di ArenaPoliti.co