Nos ta wak tur alternativa. Pero no por sigui warda mucho mas. 

E dos mocionnan cu Parlamento a aproba luna pasa ta duna gobierno e instruccion pa busca tur forma posibel pa habri e refineria den un forma cu e ta keda habri pa hopi aña. E mocion di AVP ta duna gobierno hasta mas tempo cu e mocion di PDR cu a duna gobierno dos luna. AVP ta duna gobierno te fin di aña aki. Pero AVP a bisa gobierno tambe pa no stop di busca otro alternativanan pa desaroyo di San Nicolas y "pariba di brug". Rene Herde' a enfatisa esaki atrobe e siman aki. Den e conferencia di prensa di partido AVP, ela bisa cu for di e reunion cu e minister di energia ela saca tres conclusion importante. E prome ta cu gobierno ta bon informa y bon prepara pa atende cu cualkier compania cu di berdad tin e capacidad y boluntad pa habri e refineria y ten'e habri pa hopi tempo. Gobierno tin tur plan y tur informacion di e refineria, di finansas necesario, di e mercado di crudo, di refinerianan y di e companianan cu por ta enteresa pa habri e refineria na Aruba. E didos ta cu a sali na cla cu gobierno niun momento a stop di busca activamente pa cumprador of pa companianan cu por habri e refineria y opera esaki pa hopi tempo. E ditres ta cu gobierno a haci bon uso di e mocionnan di Parlamento pa institui un comision di experto riba tur e terenonan importante manera conocesemento di e refineria, di mercado di crudo, di mercado di placa y di e asuntonan legal cu tin di haci cu e refineria. Ya e comision a cuminsa traha caba. Rene Herde:"Mi ta impresiona pa wak cuanto a haci. Ta di lamenta cu ainda no a logra un reapertura. Cu e comision nobo aki sinembargo ta duna gobierno un empuhe nobo pa haci lo posibel pa e reapertura. Pa AVP e re-apertura ta sumamente importante. E ta crea actividad economico nobo na San Nicolas. E ta crea entrada extra pa nos pais y e ta crea trabou cu bon salario pa hopi hende. Pero AVP ta realistico. Nos no tin mag di laga San Nicolas depende di e refineria so mas."

DESAROYO TA LOKE TA IMPORTANTE
Segun Rene Herde', loke ta finalmente lo mas importante ta cu ta crea actividad economico nobo y desaroyo nobo na San Nicolas y pariba di brug. Pesey tambe e "Green Corridor", e caminda hancho nobo entre San Nicolas y Playa ta asina importante. Esey lo ta un estimulo importante  pa crea actividad economico pariba di brug. Loke segun Herde' mester ta e meta final, ta cu ta crea cuponan di trabou pariba di brug, cu ta bira atractivo y interesante pa habri negoshi pariba di brug y cu pariba di brug haya un desaroyo economico, fisico y social nobo cu ta beneficia e hendenan pariba di brug. Rene Herde': "Pesey pa nos e tabata y ta asina importante pa e refineria habri. Pero na final, cu of sin e refineria, nos mester percura pa e desaroyo nobo pa "pariba di brug". Y nos no por warda mucho mas. Nos no por warda pa eternidad pa e refineria habri. E no ta husto pa desaroyo di Aruba of pa desaroyo di pariba di brug. Pesey apesar cu a haci tanto caba pa haya habri e refineria, nos kier purba un biaha mas. Pero nos a mar'e na tempo. Mientrastanto nos a pidi gobierno pa sigui busca otro actividadnan economico manera industria di energia renovabel, uso di e waf pa actividadnan di transporte maritimo regional of turismo. Cua cu e ta, e mester crea actividad economico, cu ta crea trabou y entrada pa nos hendenan. Esey tabata y ta nos meta." Asina Rene Herde' a finalisa.

Expresionnan haci den e articulo aki no necesariamente ta refleha opinion di ArenaPoliti.co