Den un conferencia di prensa Otmar Oduber a comparti e “grato noticia” cu Radisson Hotel a wordo bendi cu un grupo di inversionista local. Sr. Oduber a duna di conoce cu e no tabata directamente involucra den e proceso pa benta di e hotel y cu esaki lo a socede di un forma transparente y profesional. Segun e minister, di e 13 grupo cu a demostra interes originalmente, 5 grupo a keda escohi. Despues di a aplica “due diligence” a keda 3 grupo, y finalmente a tuma e decision pa permiti e grupo local “Aruba Growth Funds” pa cumpra e propiedad.
Segun e minister "Aruba Growth Funds" lo inverti 20 à 40 miyon florin pa renobacion di e hotel, pero na ningun momento e minister a divulga e suma envolvi den e compra/benta di e hotel. Si nos asumi cu probablemente e prijs di e benta lo por ta core rond di 200 miyon florin, anto mi ta yega na e conclusion cu e suma total cu e grupo local lo mester inverti, lo monta alrededor di 240 miyon florin.

Kendenan ta e accionistanan di e grupo local “Aruba Growth Funds” cu a wordo escohi pa cumpra e hotel? Den medionan di comunicacion sr. Rene Kan a haci presentacion di e fondo cu a wordo estableci na 2012 pa Milton Berlinski, Rene Kan and Justus Martens. Awe ta conta cu 9 persona cu ta forma parti di e ekipo. E ta e prome fondo di capital priva na Aruba cu ta ricibi su fondo for di pensioen di Aruba, WEB, Elmar y MetaCorp. Nan meta ta pa inverti den companianan estableci localmente na Aruba. Loke ta haci nan unico, ta cu nan ta consisti di un grupo completamente local, cu ta inverti solamente den companianan local y ta wordo maneha pa gerentenan di inversion local.

Tin dos aspecto di e benta y compra di e hotel cu lo mi kier a presenta den e publicacion aki. Na prome lugar mi kier a comparti mi preocupacion cu e inversion di 240 miyon florin aki lo por tin pa e fondo di APFA. Nos sa cu APFA tin di inverti pa por logra un ‘dekkingsgraad’ di 100%, pero cu awor aki ta alrededor di 76%. Pa por drecha e ‘dekkingsgraad’, APFA a yega na un acuerdo cu gobierno, cu lo bay hinca 170 miyon den e fondo. Pero APFA mester sigui inverti y tin e obligacion pa ley pa inverti 33% den proyectonan internacional y 67% nacional.
E inversion den e compra y renobacion di e hotel ta bay resulta den un “flinke aderlating” atrobe pa e fondonan di APFA, ya cu nos no mag di lubida cu ya caba a inverti na grandi den e proyecto di nos hospital.

Mi di dos preocupacion tin di haber cu e empleadonan di e hotel. Sr. Oduber ta bisa cu e grupo local ta garantisa empleo pa e trahadornan di Radisson. Despues di a bin ta ripara e desaroyonan cu a tuma lugar na Westin Hotel, mi tin e tendencia pa ta por lo menos hopi cauteloso pa no crea espectativanan cerca e empleadonan cu despues posibelmente no ta wordo cumpli. Ohala cu mi dudanan den e asunto di empleo por resulta di no ta berdad. En todo caso nos ta desea e empleadonan hopi pasenshi den e proximo lunanan, y pa despues hopi exito cu nan operador nobo.

Mi ta spera cu e sindicatonan cu nan miembronan ta aporta den APFA, y e representante di e pensionistanan den e comisariado di APFA, ta na altura di e desaroyo aki, y cu tambe nan a haña un splicacion den forma di un ‘feasibility study’ di e inversion aki. E situacion financiero di Aruba ta pesimo, y mester trata di evita posibel ‘mal inversion’, manera a socede den pasado, cu a resulta den un caida grandi di e ‘dekkingsgraad’ di APFA.

Den nomber di Union Patriotico Progresista – U.P.P.
Candelario – Booshi – Wever
Brazil, october 8, 2014

Expresionnan haci den e articulo aki no necesariamente ta refleha opinion di ArenaPoliti.co