Mester evita cu ta perde saco y cangreu.  

Minister di Turismo Otmar Oduber durante conferencia di prensa a comenta riba su posicion pa loke ta trata desaroyo di San Nicolas, riba e pregunta di miembro di prensa tocante desaroyo di hotel versus reapertura di refineria. Su punto di bista ta cu mester evita cu na final di dia ta perde saco y cangreu mirando cu ya caba inversionnan cu lo a tuma lugar e aña aki den San Nicolas a wordo para en espera di un posibel apertura di e refineria.

E mandatario a indica cu for di siman pasa caba el a notifica Prome Minister y a entrega na su coleganan di Conseho di Minister un carta riba su posicion tocante e desaroyo cu ta enfrentando na e momentonan aki, “manera Minister President mes a yame, e dilema di e decision cu mester wordo tuma pa loke ta trata reapertura si of no di e refineria”.

Actualmente ta explorando kico e posibilidadnan di un posibel reapertura ta pa evita cu un solucion a corto plazo lo bira un dolor a largo plazo pa nos comunidad. Es decir pa no haci algo cu por trece cierto bienestar, pa caha di Gobierno y pa economia riba plazo corto (2-3 aña) pasobra experiencia a mustra caba kico refinerianan a haci den mundo y sigur aki na Aruba. Mester evalua tambe e calidad di bida di nos hendenan. Durante ultimo 4 añanan a papia riba un Aruba berde, un Aruba sostenibel, desaroyonan nobo pa San Nicolas caminda ta brinda e posibilidad ey.

Opinion di diferente miembro di Gabinete Mike Eman II ta cu Aruba y sigur pueblo di San Nicolas a siña biba sin un refineria y awe hopi ta esnan cu ta bisa cu Aruba y por y a demostra tambe cu por sin un refineria. Actividadnan economico sin un refineria durante e ultimo 3 añanan a produci un crecemento economico y a mustra cu nos por.

Minister Oduber ta conciente cu un refineria den un periodo di 2 pa 3 aña por duna un empuhe economico grandi ta sigur, pero e pregunta ta si kier esaki, si kier e consecuencianan di dje, si kier sigui cu e consecuencianan cu esnan di San Nicolas tabatin manera e emisionnan di Co2 cu ta totalmente contradictorio cu e maneho estableci pa haci di Aruba e ehempel den Caribe y mundo riba e aspecto sostenibel.

Den e cuadro aki a tuma un serie di decisionnan, manera ta un Green Corridor cu tin un inversion di casi 240 miyon pa asina por crea oportunidadnan nobo pa desaroyo den e area di San Nicolas. Asina a conoce diferente inversionista interesa, pasobra contrario na opinion di algun, no ta solamente Bahia Principe, e hotel aki ta solamente e principio di loke Gobierno tabata premira pa haci di San Nicolas e di dos capital turistico di Aruba.

Minister Otmar Oduber a indica cu en berdad Bahia Principe tin e interes ainda den Pais Aruba pa inverti riba 200 miyon Dollar. Lamentablemente a ricibi un carta siman pasa unda un biaha mas e dilema di Premier Eman ta bin dilanti, pasobra a pesar cu no ta definitivo un reapertura di refineria si ta costando cu otronan cu tabatin interes di inverti e aña aki ainda den e area no lo hacie mas. No ta trata solamente di Bahia Principe, pero di inversionnan di casi 400 miyon Dollar mirando cu tabatin mas compromisonan financiero haci pa e area aki. Pesey Minister Oduber ta bisa cu sin cu a tuma e decision, ta perdiendo otro oportunidadnan y esey mester realiza na e momentonan aki. “Na final di e ruta bo por yega cu ba perde bo saco y ba perde bo cangreu tambe”.

E mandatario ta di opinion cu mester haci un evaluacion y un estudio riba e impacto cu e refineria por tin riba economia, pero tambe e impacto cu desaroyo di e area lo por tin riba nos economia (2-3 hotel y otro inversionnan pafor di e area) y tambe desaroyo di e tereno di e refineria cu por wordo haci riba diferente tereno sostenibel, continuando cu e vision di Gobierno.

“Na final mi ta sigur cu Gobierno lo tuma e decision caminda cu conhuntamente nos ta encamina riba e mihor porvenir pa e area di San Nicolas y Aruba en general. Mester percura si cu den e proceso ey nos no perde e galiña y e webo”, Minister Otmar Oduber a conclui.

Expresionnan haci den e articulo aki no necesariamente ta refleha opinion di ArenaPoliti.co