Evaluacion mester wordo haci y mester defini e ruta pa sigui awor.    

Minister Otmar Oduber a informa cu den cuadro di e conversacionnan andando pa un posibel reapertura di e refineria, a haya carta di Sr. Piñero, propietario di e cadena hotelero Bahia Principe, cu nan no lo inverti e aña aki mas den e proyecto hotelero na Seroe Colorado. Sr. Piñero a reafirma su interes pa inverti na San Nicolas, pero tambe a bisa cu un hotel definitivamente no ta compatibel cu un refineria.

E mandatario a bisa cu e ponencia aki no ta algo nobo, cu pa 30 aña largo gobiernonan tras di otro a purba bin cu hotel pariba y mes den su calidad di Minister di Turismo a cana cu hopi inversionista cu a bisa cu e lugar ta masha bunita, pero cu dia cu e tubonan no tey, dia cu e refineria no tey, pa contactnan atrobe. A haya un hende cu a bisa cu e ta kere den futuro di Aruba despues di refineria, a haci inversionnan pa por cuminsa construccion e aña aki manera tabata palabra y siman pasa a wordo notifica cu esaki ta cancela y ta pendiente di decisionnan di Gobierno y si no ta bay dor cu e refineria nan ta dispuesto pa bin bek.

Minister Oduber ta opina cu refineria tabata bon semper pa esnan cu ta traha den e refineria y pa caha di Gobierno, pero San Nicolas no a conoce un adelanto. “San Nicolas no a conoce e beneficio di tur e biyones cu a wordo procesa durante e ultimo 70-80 aña y sigur no durante e ultimo 20-30 añanan aki. Pregunta ta si nos ta na e momento corecto pa bisa cu bo ta scohe pa un desaroyo on the short term cu ta bay dunabo berdad un aumento di 2-3% den bo GDP pero cu ta bay ten koste di e felicidad di e hendenan di San Nicolas, cu ta bay ten koste di e pueblo di San Nicolas, cu ta bay ten koste di bo maneho economico cu bo por a diversifica como tambe bo maneho di sostenibilidad cu bo ta propaganda. E ta un evaluacion cu mester wordo haci, e no ta facil”.

Refineria of desaroyo turistico combina cu proyectonan a termino medio of largo ta contribui y mester wak kico ta e pro y contra di cada un di nan. Pro di e refineria ta e placa bruto cu ta wordo inverti, no tanto na Aruba pasobra tur cos ta wordo cumpra den exterior. E ta genera trabou y loon belasting, no ta sigur si e lo genera inkomstenbelasting of invoerrechten pa Aruba pasobra e condicionnan ey no a wordo defini ainda. Di otro banda e pro di e desaroyo turistico ta uno cu nos ta bon den dje, cu nos ta stabiel den dje, a surpasa e problemanan manera esun di 9/11 y Natalee Holloway y ta fuerte para, a biba di dje como e unico pilar economico durante e ultimo añanan y ademas a crece economicamente. Mester pone e dosnan aki riba balans y wak cual ta pisa mas hopi...y esey ta e dilema cu Prome Minister ta papia di dje.

Minister Oduber ta indica cu pa loke ta apertura di e refineria mester ta sigur cu e partner ta uno confiabel y mester evalua si kier cana e proceso pa haya sa esey, pasobra na caminda por perde tur e otro oportunidadnan cu tin. Esey ta loke ta poniendo riba mesa na e momentonan aki, no ta cuestion cu ta pro of contra refineria, cu ta pro of contra hotel, cu ta pro of contra green...e evaluacion mester wordo haci y e tempo ta hopi cortico, no tin te december. “Tempo ta awor pa defini e ruta cu nos kier bay riba dje”.

Expresionnan haci den e articulo aki no necesariamente ta refleha opinion di ArenaPoliti.co