ORANJESTAD – Ultimo temponan Minister di Husticia Arthur Dowers ta bou di basta presion. E situacion di criminalidad ta saliendo for di man na forma explosivo. Mientras cu e tiroteonan casi tur dia no por wordo soluciona, un campanjado AVP deteni den KIA a denuncia corupcion den KIA, un detenido studiante Venezolano ta muri den detencion na forma masha cuestionabel, y un Ministerio Publico totalmente paralisa. Tur hende ta compronde cu e presion cu e minister mester atende cun’e diariamente ta hopi grandi, y ta mustra di ta demasiado grandi pa Dowers deal cun’e.

Pa hasi cosnan peor dentro di su propio partido tin coleganan cu tin problema cu e actitud negligente di e minister, y ya nan no ta sconde esey mas.

En bes di atende cu e prioridadnan den su ministerio, e minister a dicidi di cuminsa ataca lider di MEP Evelyna Wever-Croes, pa colmo sin ningun motibo. Durante un declaracion masha bruha mes, Dowers a saca su gal contra MEP. Ta obvio cu Dowers kier desvia atencion di su mal maneho y e locuranan di su lider Mike Eman, y kier busca popularidad rancando na saya di lider di MEP.

Dowers diripiente a cuminsa acusa Evelyn Wever-Croes di a trese CFT Aruba. Ta tristo ora un hende grandi ta para bira asina infantil. Tur hende sa cu ta Mike Eman a pidi CFT bin Aruba y awor ta Arthur Dowers MES a firma pa e ley di CFT bira ley na Aruba.

Dowers ta acusa Wever-Croes di kier busca un KB pa Dowers. Cu esaki Dowers ta duna nos líder masha hopi poder, pero Dowers mester realisa cu no ta nos líder ta pidiendo KB p’e, ta su propio coleganan ta pidiendo KB p’e. Ta e propio coleganan den seno di AVP kier core cu Dowers.

Considerando tur esaki ta comprendible cu Dowers ta actua na un forma bruha manera e ta actuando ultimo tempo, sin embargo e no por hustifica su atakenan infunda. Si e presion di paden den partido y di criminalidad riba nos pais ta mucho halto, e mester tuma su retiro y no cuminsa insulta ken cu e kier. “If you cannot stand the heat, get out of the kitchen”.

Expresionnan haci den e articulo aki no necesariamente ta refleha opinion di ArenaPoliti.co