Minister Otmar Oduber ta indica cu na ningun momento el a bisa cu mester bin sea hotel of refineria, esey no ta e caso y nunca tabata e caso. E ta considera esaki un discusion totalmente robes.
E discusion cu tin no ta entre hotel Bahia Principe y e refineria, e discusion cu tin ta entre un desaroyo economico di hospitalidad, di turismo contra un refineria. Esaki mester ta bon cla, pasobra tur hende sa cu si bay compara un hotel di 450 camber y un refineria, e ora nos tur sa ki decision di Gobierno mester ta.
Minister Oduber ta bisa cu e discusion ta uno sano unda cu Prome Minister mes a bisa cu tin un dilema mirando cu den Gobierno aki tin un pensamento pa bay den direccion berde, un direccion cu Prome Minister a expresa y cu mundialmente nos a wordo reconoci pe. Ademas, hopi biaha den turismo mes e ultimo 2 aña a bay den e direccion aki unda cu tur parti cu bay ta papia di Green Aruba, cu nos ta bayendo den e direccion di ta un pais cada bes mas sostenibel. Den e mesun cuadro aki tin e desaroyo di San Nicolas, cual ta uno cu tin ya caba 3 aña trahando riba dje.
E desaroyo aki ta encera entre otro pa haci di San Nicolas un centro turistico y esaki por wordo logra dor di explora y explota e diferente hotelnan cu mester bin pariba di nos isla y hunto cune un desaroyo nobo pa Aruba, cual ta di haci di San Nicolas e centro di nos herencia cultural. Intencion ta pa haya tur e aspectonan cultural pariba di nos isla manera ta monumentonan, Carnival Village, Watertoren unda un museo lo ta ubica, Museo di Carnaval (5.7 miyon), Nicolaas Store (1.6 miyon) cu ta wordo renova y lo tey bek como monumento y un museo lo ta ubica den dje. Tambe desataho pa renova e prome mitad di Promenade a sali diasabra den corant y tin 3 miyon destina pa esaki.
Esaki ta djis pa mustra cu no ta papiando di un hotel Bahia Principe. E hotel aki tabata e inicio di un proceso cu a conduci na posibilidadnan pa mas hotel. Aki Minister Oduber a informa cu tin conversacionnan cu otro hotelnan cu kier ubica den e area aki, mientras cu tin otronan cu ta confirma cu financiamento y cu no ta all inclusive.
“Ora bo tin un parti di bo isla cu no tin nada na e momentonan aki, bo tin cu crea un volumen, un desaroyo, cu ta loke nos a haya cu un di e mihor cadenanan cu tin di all inclusive, cu ta Bahia Principe. Una bes cu bo tin desaroyo, y nos a bisa esaki mas cu 1 ½ aña pasa, bo ta cuminsa haya un cantidad di otro interes y e la tuma lugar caba. Mi por confirma cu tin interes gebacked up cu finanzas di banconan pa otro inversionnan, por ehempel un high end boutique hotel di 78 camber dirigi riba e aspecto di diving y 60 miyon Florin di inversion. Tin otro proyecto gebacked up di 60 miyon Dollar pa otro desaroyo cu no ta hotel, pero relaciona cu turismo y carga den e area aki”, Minister Otmar Oduber a duna di conoce y a agrega cu loke ta creando ta un desaroyo nobo den e area aki cu ta limpi.
Na ningun momento el a bisa cu ta contra un reapertura, loke e mandatario a bisa cu ta na e momento unda mester discuti conhuntamente e mihor destino pa e pueblo di Aruba y naturalmente e habitantenan di San Nicolas.

Expresionnan haci den e articulo aki no necesariamente ta refleha opinion di ArenaPoliti.co