Perspectiva Independiente without background 001

Minister Otmar Oduber: Mester busca e mihor desaroyo pa San Nicolas y Aruba y no por bira ciego riba un of otro opcion

Otmar07
Papiando di e refineria, Minister Otmar Oduber a bisa cu esaki a habri cera 5 biaha caba den e ultimo 25 añanan y cada biaha cu esey tuma lugar ta trece un disturbio den henter e bida economico, pero mas cu tur social na nos isla.
Cu un refineria ta haya un grupo cu entradanan mas halto si e wordo compara cu un hotel, pero no ora compare cu desaroyo di diferente hotel y otro desaroyonan turistico den e area. E tipo di desaroyonan aki ta wordo inyecta dor di henter e inversion cu Gobierno ta papiando di dje y cu por tuma lugar den e centro di San Nicolas.
Dunando un ehempel di e vision, Minister Oduber a bisa cu si bishita New Orleans mester bishita Bourbon Street, 60% di e turistanan cu ta bay New Orleans ta bishita Bourbon Street of French Quarters cu ta e area manera San Nicolas. Mescos ta na Sint Maarten, no por keda sin bishita e parti Frances. Esey ta loke kier crea pa Aruba unda actualmente e cantidad di bishitante cu ta yega pariba no ta ni 18%.
Haciendo un calculacion si crea un desaroyo di berdad, un lugar unda cu e parte cultural combina cu e parti turistico, automaticamente una bes cu pone e prome hotel, sea all inclusive of no, lo mira un cambio grandi den e cantidad di bishitantenan na San Nicolas.
Si ta all inclusive mes, e turistanan no ta keda 7 dia den e hotel, nan ta sali sikiera 2 of 3 dia, pero mester tin un desaroyo pa cargue y si e tey, den un siman di tempo, solamente cu huespednan di all inclusive lo tin aproximadamente 2 pa 3 mil hende canando rond den San Nicolas.
Banda di esey tin e ripple effect cu ta bin cu e hotel manera restaurantnan, car rentals, tour operators y esakinan ta crea mas empleo. Di e forma aki Arubianonan por haya chens di habri nan negoshi, traha mas cerca di cas, e miles di persona cu ta biba na San Nicolas por tin oportunidad di traha eynan mes, evitando e gasto di gasolin of transporte publico.
“E ripple effect cu ta wordo crea sin conta e clean up di e refineria cu mester tuma lugar den 2 aña. Esey kiermen cu aki 2 pa 3 aña por cuminsa henter un desaroyo y diversificacion riba e miles di meter cuadra unda cu por bay den direccion maritimo den cuadro di e rapport Maritiem Toekomst van Aruba, tin e posibilidad di un mega yacht cu no por pone den wafnan pabou di nos isla, tambe por wordo usa pa carga y otro tipo di industria”, Minister Otmar Oduber ta indica.
E ta bisa cu e discusion no ta cu un ta bon y un ta malo, e discusion ta cual ta miho pa nos den futuro y ta agrega cu experiencia di ultimo 30 aña ta mustra cu San Nicolas no a boom. E minister ta indica cu e opcion mester ta habri y Gobierno actual ta evaluando e posibilidadnan, nada no ta cla ainda y awor mester tuma lugar un analisis di tur dos caminda cu por wordo encamina sin bira ciego riba un of e otro.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.