GABINETE MIKE EMAN TIN ADICCION NA GASTA PLACA 

ORANJESTAD – E ley di CAFT ta un ley cu ta bai contra nos principionan democratico, pasobra Parlamento, e organo cu mester controla gobierno, ta wordo poni un banda. Parlamentarionan ya no tin tur espacio pa trese amienda of eherse nan derecho di presupuesto (Budget recht). Es mas, den e ley di CAFT mes, ningun parlamentario por cambia ni un punt, ni un comma. Esaki ta violacion di nos Constitucion y ta berguensa cu e gobiernonan di Aruba y Hulanda ta hasi algo asina. Na Hulanda nan lo no a tribi mes di hasi algo asina. Pero tur hende sa dicon nos a cai asina abou: pasobra nos tin un gobierno iresponsabel.

Ademas esaki ta un entrega di nos autonomia. “Den e dianan aki mi ta splicando hopi hende e ley di CAFT, y un meneer di 82 anja a bisami esaki: E tempo aya, si un scol na Aruba tabata tin mester di un potlood, e mester a pidi permiso na Curacao. Cu CFT, te hasta den caso di un hos of orcan Mike Eman mester pidi permiso na Hulanda! Nos no a solamente perde nos autonomia, nos ta pio para cu tempo di Antiyas!"

PAKIKO CAFT NO TA E SOLUCION?

Den e ley di CAFT AVP ta compromete su mes pa bin cu MAS medida ainda. Si bo ta kere cu awor cos ta duro, miho bo wanta duro pasobra e medidanan nobo lo corta bo te na bo weso! Pero AVP no ta baha nan mesun gasto: nan ta keda cu 9 minister, nan ta keda cu 700 coordinador y nan ta keda biaha y fiesta. Pero pa pueblo lo hisa e BBO hopi mas, lo bin cu Transaction Tax, lo corta mas den subsidionan pa cuido dio nos grandinan, di nos muchanan special, djis pa menciona algun. Abo ta kere cu esey ta husto?” lider di MEP Evelyn Wever-Croes a cuminsa cu anuncia.

E ley di CAFT ta pone Mike Eman bou di un curatela severo, cu cantidad di menasa pa KB. Mike Eman no por tuma prácticamente ningún decision mas den bienestar di nos pais. Ni den caso di calamidad e mes por dicidi, sin consulta prome cu minister presidente hulandes Mark Rutte.  Kiermeen ni den e caso di urgencia extremo nos gobierno por tuma decision, sino mester somete su mes na aprobacion di Hulanda.  Con un ley asina por ta "bon" pa Aruba?

MEDIDA CU TA CORTA TE DEN BO WESO

Den e ley aki Mike Eman ta compromete su mes pa bin cu MAS medida ainda durante tres anja nos dilanti, cada anja mester bin medidanan nobo pa logra baha e déficit manera Mike Eman a compromete su mes den e ley. Si bo ta kere cu awor cos ta duro, miho bo wanta duro pasobra e medidanan nobo lo corta bo te na bo weso! No solamente mester hisa e BBO na un percentahe hopi mas halto, pero lo bin cu e transaction tax, lo bin cu e ABB, lo kita cantidad di mama y tata di famia for di trabou y lo corta hopi mas den subsidionan di esnan mas vulnerable den nos comunidad.

MEDIDA PA PUEBLO, PERO FIESTA DI AVP TA SIGI

E crueldad y inhusticia mas grandi ta cu e ley aki tin cantidad di medida cruel contra pueblo, pero AVP mes no ta baha nan mesun gasto. Nan ta keda cu 9 minister, nan ta keda cu 700 coordinador, nan ta keda biaha y fiesta. Pueblo mester hala faha mara hopi mas ainda, pero Mike Eman y su ministernan si por sigi cu nan adicción pa gasta placa. E único faha cu Mike Eman ta hala mara, ta esun di e stoel di business class di KLM.

SOLUCION: GABINETE MIKE EMAN NO POR KEDA

Pakiko Gabinete Mike Eman no por keda? Pasobra nan a demostra caba cu nan no ta apto pa maneha e crisis financiero. Pasobra en bes di busca solucion nan a scohe pa entrega e autonomia financiero na Hulanda. Pasobra nan mes no kier hala faha mara, pero si nan ta compromete pa mas medida pa pueblo. MEP ta CONTRA e ley di CAFT pasobra e no ta soluciona e problema pa e cuidadano. E ta permiti Mike Eman sigi cu su adiccion di malgasta placa, y e ta impone MAS medida riba e cuidadano. Medidanan cu ta bai corta te na bo weso. “Ami no kier wak esey pa mi pueblo, pesey Mike Eman mester tene honor na su mes y entrega su retiro”, según líder di MEP.

Expresionnan haci den e articulo aki no necesariamente ta refleha opinion di ArenaPoliti.co