Pa por haci di San Nicolas e Capital di Herencia Cultural planificacion ta continua 

Pa por haci di San Nicolas e Capital di Herencia Cultural di nos isla mester percura cu nos bishitantenan na momento cu drenta San Nicolas sinti esaki di biaha. Conhuntamente cu Aruba Tourism Authority lo percura pa promocion tuma luga specialmente riba e website di www.aruba.com y tambe riba rednan social, pa atrae turistanan cu tin un interes particular pa nos cultura.  Ta importante pa ora e bishitantenan yega nos isla nan sa cu nos tin hopi mas di ofrece cu solamente nos bunita beachnan. Awor nos por trece nos turistanan pariba di brug pa conoce mas di cerca e cultura di Aruba tambe.

E aspecto cultural lo haya un atencion debido te hasta den e infrastructura di San Nicolas. Tin varios Monumentonan cu ta hayando nan debido atencion y por agrega tambe e proyectonan di arte publico cu ta den ehecucion. Pero banda di esaki kier pone atencion tambe riba e caya principal di San Nicolas. Tin un proyecto specifico pa embeyecemento di esaki. Ya caba e prome parti cu ta e area di Promenade tin 2 interesado pa ehecuta e plan di embeyecemento cual cu un destaho publico ta tuma luga dia 18 di September  y ta calcula cu den dos luna e trabounan por inicia.

Mientrastanto Minister Oduber a ricibi presentacion di e di dos parti di e proyecto cu ta e parti di mainstreet cu tin e parti di comercio tambe. Sr. Oduber ta bisa: “ E presentacion tabata un draft pa nos por cuminsa duna di nos banda nos opinion y a palabra mesora cu otro siman lo tin un presentacion na tanto mi persona como mi colega Minister di infrastructura Sr. Benny Sevinger, pa aproba e cambionan cu tin cu tuma luga.” Ta papia aki di un suma di 5 miyon florin cu lo bay inverti den e di dos fase di e proyecto.  E proyecto completo ta un inversion di 8 miyon florin.

E mandatario ta comenta cu despues di e proximo reunion mester tuma un decision pa traha di biaha pa e destaho publico por tuma luga pa inclui esaki den e presupuesto di 2016.

Expresionnan haci den e articulo aki no necesariamente ta refleha opinion di ArenaPoliti.co