MESTER TENE REFERENDUM PROME 

SANTA CRUZ – Parlamento lo trata awe diahuebs, un ley cu gabinete Mike Eman a manda pa regla e supervision financiero di nos pais. Sinembargo den e ley ey, tin tambe inclui entrega di nos autonomia financiero na Hulanda, algo cu Mike Eman y su gabinete no tin autoridad pa entrega.

Den e ley di CAFT gabinete Mike Eman ta wordo poni bou di curatela pa cierto decisionnan financiero, pero no pa tur. Sin embargo den algun decision cu antes ta gobierno di Aruba so por a tuma, awor ta gobierno di Reino mester tuma. E ehempel mas serio den e ley ta den caso di calamidad, pasobra ni den caso di calamidad Mike Eman mes por tuma decision. Ta mescos cu ora bo corta hala di un para cu tabata liber, pa bo sere den un haula.

E autonomía financiero cu e ta bai entrega na Hulanda, no ta toca na dje pa entrege. E ta autonomía di e pueblo di Aruba, pues prome cu e pensa mes di entrege, e mester tene un referendum, e mester consulta cu e pueblo. Si e no consulta cu pueblo, e sa cu e ta cometiendo violacionnan severo contra e derechonan di un pueblo liber manera Aruba, y nos lo no duda ningun momento pa denunci’e internacionalmente y bergonse pa esaki.

E autonomía financiero cu nos ta perde, no ta completo. Ta keda algun decisionnan cu e mes por tuma. Sin embargo ya Mike Eman a mustra cu e decisionnan ey cu ainda e mes por tuma, ta sigi cu e adicción di malgasta placa, y mes momento impone medida contra pueblo. Pasobra pa pueblo di Aruba e tin su lista di 24 medida, cu lo bin cu mas belasting nobo, ABB, financial transfer tax, lo kita mama y tata di famia, lo kita reparatie toeslag, lo corta subsidio di instancianan cu ta yuda esnan mas vulnerable. Pero den e lista ey e no tin poni cu lo baha di 9 pa 7 minister. No tin poni cu e ta bai biaha menos. Es mas, el’a caba di mustra cual ta su prioridadnan recientemente: el’a scohe pa un Green Corridor cu awor no tin prioridad, y ora CFT a puntre con bo ta bai paga p’e, ela bisa cu e ta bai suta pueblo cu un medida nobo, e financial transfer tax. Esey ta locual ta spera nos: medida pa pueblo di Aruba, y malgastamento di placa pa Mike Eman y esnan rond di dje.

Y pa e logra esey ela regala nos autonomía, y di awor en adelante ni den caso di calamidad, e mes por tuma decision. Tanto bal bo tin un prome minister, si ta Hulanda ta dicidi toch. Tanto bal bo tin un parlamento, si ta nan ta dicidi toch.

Pueblo NO a vota pa un CFT bin tuma over, pueblo NO a vota pa Mike Eman entrega nos autonomía. Pues si Mike Eman kier regala nos autonomía, e mester consulta cu pueblo prome. Fraccion di MEP lo bin cu e proposición ey durante di e reunion den Parlamento.

Expresionnan haci den e articulo aki no necesariamente ta refleha opinion di ArenaPoliti.co