Perspectiva Independiente without background 001

Gabinete ME II: Trabounan na hospital ta canando segun schedule

Mike construccion HOH
Prome Minister Mike Eman a duna un man cu bashamento di fundeshi na Hospital 


ORANJESTAD- Den oranan hopi tempran di mainta empleadonan di OHL Arellano y Bohama a cuminsa cu e inmenso trabou di bashamento di fundeshi pa e edificio riba tereno di hospital na unda e warehouse ta bay bin, e luga central di distribucion di hospital. Prome Minister Eman tabata presente y den forma simbolico a duna un man bashando cement den e fundeshi. Manager di OHL Arellano Jeff Shaheen tabata presente hunto cu Ruben Croes, project manager y coordinador di construccion pa parti di hospital. Presente tambe ta e otro Ruben Croes, di  HJC Engineering Consultancy NV y controlado di tur loke ta regarda e trabou di construccion na e sitio. Riba tereno di Hospital tin banda di OHL Arellano, dos contratista local trahando, Bohama y Albo. Tambe tin contratistanan chikito ta yuda cu e trabounan.

“He did a fantastic job”, Shaheen a bisa di Prome Minister Eman.  E manager di OHL Arellano a splica cu e trabounan ta canando segun schedule, loke ta hopi bon. Eman di cu e ta hayando mas y mas experiencia ya cu mas biaha e ta yuda ora tin avancenan di trabou di proyectonan di gobierno. “Durante construccion di edificio di Cocolishi nos tabata duna aporte cada biaha cu tabata yegando un otro piso. Mi tabata aki algun tempo pasa y a wordo invita pa bin wak ora ta basha un di e vloernan. Awe ta trahando riba e edificio cu ta bay bira e warehouse acopla na e edificio cu ta bira e utilities di hospital. Aki nos ta papia practicamente di un hospital nobo. Ta bay bin un sala di emergencia di 17 camber y ariba ta bay bin un cantidad di camber cu ta bay haci posibel cu ora habri e hospital ‘nobo’ no ta bay tin cambernan di 5 of 6 persona mas, pero di 1 of 2 persona, loke ta importante pa privacidad y trankilidad di e persona cu ta hospitalisa. Esaki ta un contribucion di e Aruba di 5 strea cu nos kier pa nos hendenan.”

Eman a bisa cu por mira con e trabounan ta andando full speed y esnan cu ta supervisa ta bisa cu tur cos ta ‘on schedule’. “Hopi biaha den construccion tin contratiempo, pero aki esey no ta e caso. Unda nos ta aki para ta wordo construi door di Bohama. Loke ta bunita di e proyecto ta cu e compania madre cu a gana e destaho publico, a envolvi un cantidad di otro contratista local, percurando pa mas hende haya trabou y di e forma aki tin efectonan economico y financiero. Mas hende haya trabou, miho ta pa nan mes y pa economia di Aruba.”

Na e momentonan aki na Aruba tin un cantidad di trabou di construccion andando. “Esaki ta algo historico”, Eman a remarca. “Historico pasobra no ta trabounan cu ta sosode tur dia den un pais y den caso di Aruba por ta cada 30 of 50 aña cu trabounan asina ta surgi.” Na e momentonan aki tin construccion di un hospital nobo. E hospital actual tin mas di 35 aña bieu, mescos ta conta pa e waf di container cu ta bin na Barcadera cu ta completamente nobo, trabounan den waf di Playa cu ta otro renobacion grandi, Green Corridor, Watty Vos Boulevard cu ta bay bin rond di Oranjestad. “Un cantidad di trabou cu ta crea empleo, cu ta crea entrada pa nos hendenan y ta stimula economia. Ora cu e construccionnan tur keda cla ta keda atras un infrastructura moderno, bunita y efectivo.”

Imagen Imagen

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.