Su apertura oficial ta diahuebs awor 

ORANJESTAD - Despues di a haya – hunto cu su coleganan Minister - un guia den e edificio multifuncional di MFA Noord, Minister Michelle Hooyboer-Winklaar, a bisa cu su prome impresion ta cu e edificio ta un facilidad unico, hopi moderno y yamativo. Prome cu Minister Hooyboer-Winklaar a drenta den sala di reunion pa atende e prome reunion di Conseho di Minister den e edificio di MFA Noord, el a expresa su opinion pa loke ta e edificio nobo unda cada espacio ta wordo uza pa acomoda e diferente servicionan brinda eyden.

Minister Hooyboer-Winklaar: “Loke ta remarcabel ta cu hendenan di otro barionan tambe ta bin aki pa haci uzo di e diferente tipo di servicionan cu ta wordo duna. Esey riba su mes ta algo unico den un setting hopi bunita. Cu e MFA aki e señal a keda duna pa sigui cu e otronan, ya cu tin mas MFA biniendo, Minister a enfatisa. “Su meta principal ta pa uni un bario den diferente forma. Loke mi a haya fantastico ta e atelier, mescos tambe e espacionan cu tin unda por tene charla y reunionnan. Manera e palabra ta bisa, e ta un lugar multifuncional. Esey ta cubri e definicion di loke nos ta mira awe.” Minister a keda encanta cu ta bay bin cu un biblioteca den MFA Noord. El a splica cu nan ta pensando riba un forma creativo con pone e biblioteca funciona. “Lesa ta bon y nos mester stimula esaki”.

“Ami semper a gusta arkitectura”, Minister dr. Alex Schwengle a bisa despues di a pasa door di e edificio di MFA Noord. “Aki nos ta mira un arkitectura hopi moderno unda a trece elementonan di pesca den dje loke Noord ta conoci p’e. Loke mas importante ta e motibo pakico a bin cu e centro aki. Minister President mes ta splica esey hopi biaha. E MFA’nan ta bin di un necesidad. Ta traha hotel bunita pa e bishitantenan, pero e servicionan ta wordo duna den edificionan hopi inadecua y bieu. A bira tempo pa bin cu un edificio nobo, na unda banda di servicionan di semper, ta brinda servicionan nobo. Tambe e MFA’nan ta bira lugarnan unda habitantenan por topa otro. Dus, un centro pa comunidad.” Pa loke ta presencia di AZV den e edificio di MFA Noord Minister Schwengle ta haya cu esaki ta un punto extra di servicio. No solamente pa brinda e servicio riba su mes, pero tambe pa e ta eficiente. “AZV a evalua esaki riba su mes y mirando cu e poblacion di Noord ta hopi grandi, AZV a decidi pa aloca un stacion aki.”

Diahuebs awor MFA Noord ta wordo oficialmente inaugura. Pueblo di Aruba y specialmente comunidad di Noord ta keda invita pa bin atende e anochi special aki.

Expresionnan haci den e articulo aki no necesariamente ta refleha opinion di ArenaPoliti.co