Gabinete ME II: "Accion di Fin di Aña: December ta habri cu dianan special cu por Parkeer gratis"
Anuncio sumamente grandi pa Caya Grandi
4, 5, 12, 19, 21, 22, 23, 24 y 31 di december no mester paga pa parkeo
ORANJESTAD – Un anuncio sumamente importante pa temporada di compras di fin di aña a keda haci diabierna ultimo durante un conferencia di prensa di gobierno. Prome Minister Mike Eman, hunto cu comerciantenan di Caya Grandi a anuncia cu den december ta bin cu dianan special cu parkeo ta totalemente gratis.
E decision aki a keda tuma den Conseho di Minister ayera mainta como contesta na peticion haci dor di e organismo transitorio cu pronto lo bira e fundacion OBID y ta encarga cu tur asunto di Caya Grandi na Oranjestad.
E fechanan ta 4, 5, 12, 19, 21, 22, 23, 24 y 31 di december. Riba e dianan aki no lo mester paga pa para auto den centro di ciudad. A remarca cu esaki ta conta exclusivamente pa e vaknan blanco, ya cu esnan geel ta keda reserva pa esnan cu a paga p’e.
Comerciantenan a expresa nan satisfaccion y gradicimento na Minister President pa a duna oido na nan peticion y di su banda, Prome Minister Mike Eman a gradici particularmente e cooperacion di su colega Minister di Transporte, Otmar Oduber. Gobierno di Aruba ta kere firmemente cu, mescos na otro paisnan rond mundo, e introduccion di un sistema di parkeo paga lo crece eventualmente den su aceptacion. Na mesun momento kier duna un apoyo na e sector comercial den e temporada mas grandi di actividad y na mesun momento, facilita e celebracion di e tradicional pagaranan riba ultimo dia di aña.
Expresionnan haci den e articulo aki no necesariamente ta refleha opinion di ArenaPoliti.co