Evelyn Wever-Croes (MEP): MEP si a maneha cartera di husticia na forma efectivo
Desde Gabinete Mike Eman no tin maneho mas!
STA CRUZ – Desde cu gobierno a cambia na 2009, y Aruba a yama ayo na ex minister Rudy Croes pa pone Arthur Dowers, bo por a nota cu no tabata tin ningun maneho ni vision mas. AVP ta haci bon propaganda, nan ta manipula bon, pero nan no sa con pa goberna. Unico cos cu nan tabata interesa den dje e ultimo 6 añanan ta persecucion politico, y para tur e proyectonan cu durante 8 aña di MEP a haci nos pais mas sigur. Den pueblo ta wordo compara kico MEP a haci y kico AVP a haci. Y ta masha hopi logro di MEP por wordo menciona, sinembargo campañadornan di AVP kier pa hende lubida e logronan di MEP. Pesey ta importante pa ripiti algun di e logronan di Gabinete Nelson Oduber, pasobra eseynan tabata logronan real y efectivo riba tereno di husticia.
- Renobacion y ampliacion di K.I.A y compra di inventario (equipo y material) pa KIA., despues no a sosode nada mas
- Construccion di Warda di Polis na Noord,
- Construccion di Centro di Husticia y Warda di Polis na Santa Cruz,
- Helicopter pa Aruba,
- Lease di Radarnan di Raytheon pa combati ilegalidad,
- Institucion di Warda Nos Costa,
- Introduccion di Flexi-team y Arrestatieteam,
- Institucion di polisnan di bario (barioregisseurs),
- Camaranan infrared (Nightvision) pa Warda Costa, Cuerpo Policial y Douana,
- Compra di sistema automatisa di informacion ‘Base pa departamento di recherche’,
- Compra di sistema automatisa pa registra fingerprints (AFIX tracker),
- Visibility teams pa Hi-Rise, Lo-Rise Hotels, Centro di Playa y San Nicolas,
- Compra di mobilario pa Polis y aparatonan special pa TOHD,
- Compra di boto nobo pa Maritiem Politie,
- Proyecto di Radex pa Inmigracion na Aeropuerto,
- Inversion di FOL na Aeropuerto
Nos tur sa cu e enfasis di e gabinetenan di Mike Eman tabata pa caba cu tur loke MEP a cuminsa. Nan NO kier a continua cu maneho di Nel Oduber ni di Rudy Croes. AVP a yama tur pa corupto y kier a para tur cos. Talves tin hende cu kier lubida esey, pero pueblo si ta corda. Nos por mustra respet pa un politico cu ta critica maneho di su oponente, y ora e yega na mando ta cambie pa algo MIHOR! Pero esey no a pasa. Mike Eman y su grupo di minister a para casi tur desaroyo drechi di nos pais, riba tereno economico, financiero, husticia y medio ambiente, pero no a bin cu NADA a cambio. Y pesey awe nos pais ta den un problema serio financieramente, pero tambe di insiguridad severo. Aruba merece mihor, y si bo mes no tin mihor idea of bo no tin vision, por lo menos continua cu e proyectonan cu gobierno di MEP a cuminsa, pasobra eseynan tabata realmente efectivo. E tempo ey criminalidad tabata bou control. Aruba merece mihor.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...