"Durante un entrevista Parlamentario sr. Guillfred Besaril a duna su opinion riba e posibel envolvimento di Parlamentario sr. Sneek den un incidente di "Hit & Run" dos siman pasa. Parlamentario sr. Besaril a comenta lo siguiente:

"Mi a tuma nota di e incidente lamentabel den cual un miembro di Parlamento di Aruba, miembro di Fraccion di AVP, a haña su mes envolvi den dje. Un incidente automobilistico ta un situacion masha desagradabel. Pero lagami cuminsa na informa Pueblo di Aruba, cu Fraccion di MEP ta un grupo di profesional cu ta atende cu incidentenan asina cu e cautela necesario. Porta hopi lo a verwacht cu nos lo a sali bai den atake sin mas. Pero baha na nivel di riool, pa simplemente "Score" riba un adversario politico, no ta un don cu nos Fraccion ta interesa na practica. Na Spaño tin un dicho popular cu ta bisa: "Hacer leña del arbol caído!"

Loke si mi a hasi den nomber di nos Fraccion, ta di entrega un cuestionario oficial na cuidadano Minister di Husticia relaciona cu e caso aki. Ta varios ta e versionan cu keto bai ta sirculando den Pueblo desde cu e accidente aki a tuma lugar. Varios ta esnan cu a yama na diferente radio pa vocifera nan mes, cu e accidente no sucede mane cu Parlamentario sr. Sneek a declara den Prensa. E informacion cu ta sircula riba e diferente "Social Media's" tambe ta diferente na e declaracion di sr. Sneek. E falta di claridad aki, ta valida un investigacion (Feitenonderzoek) pa asina Pueblo por tin un miho bista riba e comportacion den trafico di e Parlamentario en cuestion.

Mi persona tambe a pasa den un incidente di trafico algun luna atras. Pero e diferencia grandi entre mi caso y esun di Parlamento sr. Sneek ta entre otro:
1. Cu mi persona wordo acusa di tur clase di cos, mi a ser lastra den tur sorto di forma pa e Fraccion di AVP, sin cu nan tabata tin niun sorto di prueba di loke nan tabata acusa mi persona di dje. 2. Na final di e investigacion di tanto autoridad hudicial como e companianan di seguro envolvi, a yega na e conclucion cu no tabata tin nada particular den mi caso. A trata di un incidente di trafico den cual e auto contrario NO a duna mi persona preferencia y danki na Dios, a keda limita na solamente daño material.

P'esey mi ta hasi uzo di un otro dicho popular: "El que NO la debe, NO la teme!" Si bo no a hasi nada malo, bo no mester tin nigun clase di problema pa un investigacion tuma lugar. Pa es motibo ey, nos Fraccion a aserca ciudadano Minister di Husticia pa asina e hasi e ehercio necesario, cu ayudo di Ministerio Publico, pa nos por haya un claridad den e asunto aki. Den e caso cu no tin nada particular, ta bon so e porta pa Parlamentario sr. Sneek". sr. Besaril a termina.

Expresionnan haci den e articulo aki no necesariamente ta refleha opinion di ArenaPoliti.co