Diabierna anochi a tuma luga apertura oficial di e exposicion "Expedicion Rescate" na Parke Nacional Arikok. Durante un anochi sumamente ameno Minister Otmar Oduber tabata presente pa presencia y habri e exposicion interesante aki. Expedicion Rescate ta un bunita proyecto cu ta enfoca riba conserva e historia y storia di nos grandinan specialmente cu e topico di nos naturalesa. Un proyecto cu a inicia na aña 2010 bou di iniciativa di Departamento di Cultura y varios  partner grandi. Na 2012 e proyecto a tuma un rumbo enfocando mas riba nos naturalesa. E exposicion ta papia en particular di 4 rooi cual ta Rooi Juditi, Rooi Tambu, Rooi Barbacua y Rooi Spierto di cual tur 4 ta ubica den Parke Nacional Arikok. Den e traspaso di historia di e sitionan natural, a resalta tambe e aspecto cu tin hopi palabra y dicho cu ta den peliger di bay perdi. Cu e exposicion aki tur esaki a keda documenta. Pa locual ta trata e documentacion enparticular, esaki tambe a bay den un forma unico, unda entre otro un artista hoben bon conoci manera ta Armando Goedgedrag a forma parti di esaki. Esaki ta demostra e interes di nos hobennan pa cu NOS Cultura y NOS identidad.
Tur presente a siña hopi mas di nos naturalesa pero tambe di nos herencia imaterial. Storianan y conocemento di nos grandinan cu ta pasa di generacion pa generacion di cual ta netamente un di e puntonan di importancia den e maneho y vision di Ministerio di Cultura. Minister Oduber ta bisa: "Ta di suma importancia pa nos sigui traspasa e informacionnan aki y percura pa e keda bibo pa nos futuro generacionnan tambe disfruta di dje."

Expresionnan haci den e articulo aki no necesariamente ta refleha opinion di ArenaPoliti.co