Oranjestad — Conseho Consultativo ta critico den su relato anual 2015 riba e fayo di Aruba di no por coregi su mes. Esaki pa motibo di dos ley cu na anja 2015 a wordo aproba y na unda masha tiki atencion a wordo duna na e objecionnan cu e Conseho tabatin riba e dos leynan aki. Conseho Consultativo a mustra den su consehonan cu e `Landsverordening Aruba tijdelijk financieel toezicht' ta en pugna cu Constitucion di Aruba y cu e 'Landsverordening tot vaststelling exploitatiesaldo 2013' ta en pugna cu Ley di Comptabilidad. A pesar di e objecionnan pisa aki ambos ley a wordo aproba dor di Gobiemo y Staten sin cu cambionan necesario a wordo haci riba nan. E dos leynan aki tampoco a wordo proponi pa Gobernador pa nan wordo anula. Mirando cu Conseho Consultativo no tin mas forma pa actua den un situacion asina (pues Conseho Consultativo su funcion ta di consehero), e ta lansa e pregunta cu si no a bira tempo pa pensa riba un Corte Constitucional (Constitutioneel Hof), na ehempel di esun di Sint Maarten. Un Corte Constitucional ta autorisa pa anula leynan den casonan asina. Cu introduccion di un Corte Constitucional Aruba su posibilidad pa por coregi su mes lo hanja un impulso importante.

Den e terra di e relato anual Conseho Consultativo ta remarca cu bon gobernacion ta un di e balornan fundamental di e structura estatal di Aruba. Segun Statuut di Reino Hulandes e deber pa salvaguardia e calidad di gobemacion ta na prome lugar responsabilidad di e paisnan mes. E Consehonan Consultativo di Aruba, Corsow y Sint Maarten y Raad van State di Hulanda cada un tin su tarea akinan. Via consehonan obligatorio y tambe no-obligatorio nan por mustra nan gobiernonan riba desaroyonan of situacionnan na unda bon gobernacion lo por bin na peliger. Nan tin como tarea pa contribui na e calidad di bon gobernacion. Ora cu un pais no cumpli cu reglanan di bon gobernacion Statuut ta duna Reino e posibilidad pa interveni. Ora cu na 2014 no a sigui conseho di Conseho Consultativo encuanto di un finanza publico solido y corecto, esaki a resulta den intervencion di Reino den forma di un instruccion na Gobernador di Aruba y supervision financiero na 2015, aunque mester remarca si cu Conseho Consultativo ta di opinion cu e dos medidanan aki no tin un base legal ferme y cu e College Aruba financieel toezicht como landsorgaan tin un posicion for di lugar den e estado di derecho di Aruba.

Den e anja di e relato aki Reino no a haci uso di su posibilidad pa interveni. Conseho Consultativo tabatin objecionnan pisa contra e concepto di ley 'Aruba tijdelijk financieel toezicht (LAft)' y riba e concepto di ley 'Vaststelling exploitatiesaldo 2013'. Ambos concepto di ley a wordo aproba sin cu e erornan seuiala a wordo coregi of - despues cu e leynan a wordo aproba —nan a wordo anula. Durante e conferencia na october 2015 entre Raad van State y e Consehonan Consultativo di Aruba, Corsow y Sint Maarten, Conseho Consultativo di Aruba a lansa e pregunta ta kende awor ainda tin e tarea di mustra riba e erornan den e LAft?' E pregunta aki tambe ta conta pa e Tandsverordening tot vaststelling van het exploitatiesaldo 2013' cu a wordo aproba na fin di anja 2015. Mirando cu e mecanismo di Aruba pa coregi su mes hopi biaha no ta presente y awor tambe cu intervencion di Reino no a tuma lugar, ta parce cu e momento a yega pa pensa seriamente riba un actor nobo riba e escenario: un Corte Constitucional.

Presidente mr. F.M. de los Santos Goedgedrag ta relata den su prologo: 'Nos mes ta conclui mas aleu den e relato anual aki cu na unda e tarea di Conseho Consultativo ta caba y otro institucionnan lo ta mirando otro banda, un Corte Constitucional, por ta na ehempel di e Corte Constitucional di Sint Maarten, ainda lo por brinda un solucion. Cu esaki nos ta spera di por yuda hiba e discusion riba e tema aki mas adilanti.'

E relato anual di Conseho Consultativo ta publica riba e website: www.rva.aw. Eynan tambe tin publica e consehonan cu ta wordo menciona den e comunicado aki.