Den conferencia di prensa di Partido Democracia Real, Andin Bikker lider di fraccion, a compara e situacion na Brasil cu esun di Aruba y a bisa cu prome minister Mike Eman tambe tin cu saca su conclusion y entrega su retiro manera senado na Brasil ta exigiendo di nan presidente di e pais.
El a expresa cu si na pais Brasil nan ta bezig ta dicidi cu nan presidente mester bay, anto e ta kere cu na Aruba tambe nan mester saca nan conclusion.
Segun Bikker e motibonan palpable pakico nan ta dicidiendo esey den Senado cu e presidente no por sigui den su funcion, ta pasobra na caminda pa eleccion, el a dorna, sconde of pinta un mihor “picture” cu realidad pa locual ta trata presupuesto.
Palabra textual di e lider di PDR: “ Den pais Aruba nos a constata cu tin añanan caba cu Raad van Advies ta bisa cu e presupuesto ta irealistico, y despues Reino Hulandes mester a cay aden y constata cu esaki ta un hecho.
“A bini cu un KB, un decreto pa loke ta trata presupuestonan y e situacion financiero penoso di Pais Aruba, y nos a wak cu hasta un presupuesto a keda sin wordo firma door di Gobernador door cu e ta irealistico. Anto tur e cosnan aki a pasa den nos pais hasta cu a bin un CAFT cu a impone toezicht of supervision riba nos pais pa loke ta trata finansas publico”.
Segun Bikker si esey ta pasando na Brasil, e ta kere cu señor Mike Eman mester saca su conclusion pasobra el a hiba Aruba den un abismo financiero, a redobla nos debe den menos cu cuater aña di gobernacion, a haya un KB door di e manera irealistico cu ta maneha e finanzas publico di Aruba, cu ta bay scapa nos pais de su propio debacle causa pa gobierno. Segun Andin Bikker “ta increible cu na Aruba, un gobernacion ta haci y deshaci, gewoon pa, na caminda pa eleccion, sconde cifra, of dorna cos, anto ora di eleccion ta bin resulta cu no ta asina y Hulanda tin di cay aden”.
Bikker ta haya cu nos pueblo votador mester evalua cu no por tin cada bez un mandato di un partido so. Esey pasobra ora esey sosode tur sorto di cos di mal gobernacion ta bin, y tin hopi critica, pero e gobierno ta keda sinta y ni musca ta bula.
Bikker a bolbe trece dilanti cu un minister a bisa cu si pa dia 1 di Maart no ta bin cambio e ta tuma su retiro, pero nada a cambia, 1 di Maart a pasa dia bieu y e minister tampoco no a retira.
“El a critica y manera nan ta bisa ‘prome cu bula’ nan ta corta bo hala”. Bikker  a ripiti cu ora tin un signatura so tin apoyo den Parlamento, e bon gobernacion no ta wordo sirbi!
Bikker a trece dilanti cu por wak e preguntanan cu sr. Bosman a haci den Tweede Kamer, y cu a wordo contesta siman pasa y tres di nan a bay dirigi riba esey.
El a bisa e minister di Reino cu ta un hecho cu na Aruba no tin coalicion, y e minister a dune razon, cu ta un hecho cu no tin balansa den gobernacion di Aruba y e motibo ta  cu no tin coalicion y un grupo ta sostene gobierno y kico cu pasa ta batimento di man y e grupo aki ta controla oposicion na luga di controla gobierno, pero gobierno ta keda sinta y nada ta pasa.
Reiterando mi ta bisa cu prome minister Mike Eman mester wak kico ta pasando na Brasil y  saca su conclusion” Bikker a bisa

Expresionnan haci den e articulo aki no necesariamente ta refleha opinion di ArenaPoliti.co