San Nicolas lo conoce un cambio den un esfera mas Artistico y Cultural. 

Recientemente Minister Otmar Oduber a bay inspecciona e diferente proyectonan andando na San Nicolas. Museo Industrial cu lo keda ubica den e Watertoren, como tambe e Comunity Museum cu lo keda ubica den e monumento di Nicolaas Store, ambos ta proyectonan cu ta encaminando rapidamente. E Watertoren riba su mes ta un icono importante pa San Nicolas, por bisa cu e ta e carra di San Nicolas. Nicolaas Store ta un monumento cu hopi a keda contento pa mira e esfuerso grandi haci pa conserva esaki. Apertura oficial di ambos museo lo tuma luna na September proximo. Directora di Fundacion Museo Arubano, Sra. Anky Volijk ta indica cu e desaroyonan pa cu ambos Museo ta bayendo hopi bon. Actualmente ta finalisando e fase di planificacion conhuntamente cu instancianan di Hulanda y awor ta cla pa cuminsa ehecuta. Pa e directora di FMA ta hopi importante pa cumpli cu e fecha stipula pa e apertura pero mas cu esey ainda ta importante pa percura cu e producto final di ambos museo ta di un calidad halto reconoci mundialmente. Banda di e museonan Minister Oduber tabata sumamente entusiasma pa mira e trabounan di e prome fase di e area di promenade. E mandatario ta splica cu lo crea espacionan cu sombra pa personanan por sinta y disfruta di e resultado di embeyecemento di e area aki na San Nicolas. Den e mesun esfera di e embeyecemento a combersa cu e doñonan di e negoshinan den e area pa asina nan tambe forma parti di henter e desaroyo. E ta parti di un vision mas grandi unda ta uni turismo y cultura creando di San Nicolas nos capital di nos herencia cultural. Curtis Fraiser cu ta Coordinador di e proyecto na San Nicolas, ta splica cu e comerciantenan ta reacciona sumamente positivo y ta entusiasma asina nan mira ki potencial henter e area aki tin. E vision pa e caya specifico aki  ta encera un expresion artistico unico. Minister Oduber ta indica cu e intencion ta pa banda di e murayanan di Aruba Mural Projects, bin mas arte den e espacio publico cu lo inclui te hasta un asina yama "take over" di e edificionan pa nos artistanan local. E comerciantenan ta cla pa colabora den e desaroyo artistico y cultural aki. E desaroyo y proyectonan ta parti di un plan cu a inicia 3 aña pasa, despues cu a haci un bishita na New Orleans cu un delegacion di Aruba. Awe ta asina leu cu por mira concretisacion di Aruba su capital di herencia cultural. E concepto ta cu asina bo drenta e caya aki bo haya un impresion di arte y cultura di Aruba. Indra Zaandam consehera di Ministerio di Cultura ta splica cu e lo lanta curiosidad den nos comunidad pa sa mas di nos cultura y cerca nos bishitantenan e lo bira un atraccion unico. Henter e desaroyo aki por crea beneficionan economico tambe na momento cu e bishitantenan ta interesa pa cumpra productonan local y autentico of te hasta sinta den e area come disfrutando di nos platonan tipico. Di e forma aki tur por disfruta y experiencia cultura di nos isla den un area unico na San Nicolas. Minister Otmar Oduber a keda hopi satisfecho pa mira tur e proyectonan den pleno ehecucion.

Expresionnan haci den e articulo aki no necesariamente ta refleha opinion di ArenaPoliti.co