Andin Bikker, lider di PDR ta contento pasobra Raad van Advies ta sostene un vision di su fraccion, den un resolucion pa bin cu un Corte Constitucional pa Aruba, mescos cu tin na Sint Maarten.

E resolucion aki a ser presenta na Januari aña pasa, durante un reunion interparlamentario cu Aruba Curacao y Sint Maarten.

Den sintesis Andin a referi na kico ta un Corte Constitucional. El a splica cu na Merca, Hulanda y otro paisnan tin dos Parlamento: Uno forma pa e diputadonan y e otro pa senadornan, pues dos camara. “Nos ta un camara, nos ta senador, diputado, tur cos den un” el a bisa.

Tur cos nan ta haci manera participa den Parlatino, bay Hulanda cada seis luna pa presenta amienda, mocion, etc.

“Mi mes tin hopi amienda na mi nombre, desde cu PDR a drenta Parlamento, den e Senado Hulandes”.

El a bisa cu hecho ta cu na Hulanda, despues cu tin e votacion politico den Tweede Kamer, ta bay Eerste Kamer cu ta esun cu ta controla e ley riba su meritonan huridico.

Aki na Aruba nos ta haya un conseho negativo di Raad van Advies cu ta bisa pa no presenta e ley ey na Parlamento mes, pasobra e no ta sirbi, pero e esnan cu ta sostene partido di gobierno ta vota pro, hasta den leynan cu ta contra nos constitucion, segun Bikker.

E ta lamenta cu na Aruba tin un tradicion di trinta aña caba cu cada bez cu un partido so ta na mando, e fraccion mayoritario ta gaña rabia, sundra e minister pero nan ta vota PRO of VOOR toch. “Nan ta vota aproba e ley, manda flor pabao, etc., anto bo tin e ora ey un ley cu ta contra nos Constitucion, pero unda bo ta bay?” Bikker ta observa.

Na Sint Maarten, aworaki, tin e Corte Constitucional y dia cu Aruba a sali for di Antiyas nan a redacta un “samenwerking regeling” cu a stipula cu mester bin cu un Corte Constitucional loke nunca a tuma lugar.

Segun Bikker e no ta cumbini gobiernonan pasobra despues un ley wordo aproba den Parlamento tin otro hende, otro wowo, otro instancia cu ta bay wak si e ley aki ta conforme cu nos leynan y e prome capitulo di nos Constitucion.

“Mi a wak esaki y bisa cu si Sint Maarten tin un Corte Constitucional caba, kico ta costa pa Aruba tambe haya cooperacion y bin cu e mesun Corte aki. Y ta net na Januari aña pasa cu e resolucion aki a wordo aproba unanimamente door di tur tres Parlamento, esta Sint Maarten, Curacao y Aruba y aworaki mi ta hopi contento cu Raad van Advies den su rapport annual cu nan a presenta siman pasa ta apoya esaki y ta puntra si na 2016 ainda por biba den un Estado di Derecho, sin un Corte Constitucional”, Bikker a conclui.

Expresionnan haci den e articulo aki no necesariamente ta refleha opinion di ArenaPoliti.co