Mas cu un aña pasa sr. Schwengle a acepta e propuesta di su amo Mike E. pa drenta politica cu e promesa di lo haña nombracion como e siguiente minister di salubridad.
E acto repentino aki tawata pa ami personalmente incomprendibel pa diferente motibo.
Como minister di salubridad mi a haci tur mi empeño pa ofrece yiunan di tera e posibilidad pa sigui cu nan estudio avansa den e.o. medicina.
Sr. Schwengle ta un di nan cu a wordo brinda e oportunidad pa medio di un studieopdracht di sigui specialisa su mes den e area di cardiologia prome, y pa motibonan fuera di nos alcanse a dicidi di cambia esaki den pulmonologia, despues cu ela haya un "opleidingsplaats" riba su mes. Consequentemente no a haci uso di e oportunidad cu e como yiu di tera a wordo ofreci.
Despues di a termina su specialisacion como longarts, atrobe mi mester a interveni den su fabor, pasobra e director di hospital di e tempo ey tabata kier a tuma un Hulandes Europeo den servicio di hospital, y en bez di sr. Schwengle.
Y mi a para’riba cu si e yiu di tera dr. Schwengle no wordo tuma den servicio, e  Hulandes Europeo aki tampoco lo haya e permisonan necesario pa eherce su trabow na Aruba. Cu otro palabra mi maneho tabata cu nos yiunan di tera ta bin na prome lugar.

Den su prome declaracionnan sr. Schwengle a duna di conoce cu e a acepta e reto aki, apesar di a bay atras den salario, pa bienestar di e pueblo Arubiano, y igualmente e a haci declaracion na diferente hende cu e lo no regresa mas como longarts, pero cu e lo bay dedica mas atencion na management en general.
Reintegracion como longarts, despues di un carera politico, lo no por tawata by the way posibel sin mas tampoco, pasobra sr. Schwengle lo no a cumpli cu e reglanan hulandes pa registracion di specialistanan.

Nos ta na altura cu den pasado ya caba sr. Schwengle a haci un peticion pa wordo permiti pa traha parttime como longarts na hospital, y cu e conseho di su propio ex-coleganan no tawata positivo.
Awor aki mi a haña un informacion confidencial via mi postbus cu sr. Schwengle atrobe a haci un peticion na directiva di hospital pa eherce parttime (20%) su funcion como longarts banda di su labor como minister.

Pueblo ta wordo azota door di medidanan pa culpa di un mal gobernacion di e gabinete di Mike E. cu, rechasando e propuesta di gobernador, toch a nombra 9 minister y a tuma un cantidad di hende den servicio como coordinador, pa awor aki nos bin comprende cu sr. Schwengle a yega na e conclusion cu e “wega” politico y maneho ministerial tawata mucho pisa p’e, y cu a dicidi di haci un “comeback” toch como longarts.

Mi kier a remarca cu e minister aki, hunto cu AZV y directiva di hospital, a kibra e posibilidad di un otro yiu di tera cu a specialisa na Spaña como longarts y ta casa cu un Arubiano tambe, pa bin eherce su funcion na Aruba. Mi a comprende cu nos hermana isla Corsou a tume cu man habri.

Atrobe e dicho ta mustra nos cu e caminda pa algun ta hancho y lamentablemente pa otro ta hopi smal. Sr. Schwengle ta bon na altura cu mi mester a haci un empeño grandi pa laga dos Arubiano jong, specialisa den e ramo di longarts, haña e oportunidad di bin eherce nan funcion aki na Aruba.
Pakiko no por a trata e otro hoben specialista Arubiano cu e mes un dedicacion. E colega longarts di sr. Schwengle no mester a bira victima di un gobierno y minister di salubridad cu tin unicamente nan propio interes na pecho. Si sr. Schwengle a tuma e decision di bandona su puesto como longarts y start un profesion nobo como politico, anto e mester a tene su mes na e consecuencianan y no perhudica otro cu sí ta pone e interes di e patient na prome lugar.
Aki e minister ta mustra su hipocrecia y egoismo, na unda ta prefera di kita un oportunidad di un yiu di tera bin traha na Aruba, poniendo presion riba su muchanan manda den Raad van Toezicht y Raad van Bestuur, pa e mes por traha como longarts.
Tin un dicho na Hulandes cu ta aplicabel aki perfectamente pa e actitud egoista y hipocrita di Alex S.: "ikke, ikke, en de rest mag stikke"!!

 
Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 14, 2014

Expresionnan haci den e articulo aki no necesariamente ta refleha opinion di ArenaPoliti.co