2014 ta keda marca den historia como un aña cu hopi sla pa e ciudadano. E mesun ciudadano cu for di 1986 ta apoya sea AVP of MEP na 2014 a haya e recibo cu e tin cu paga via tanto medida pa e mal maneho financiero y corupcion di nos gobernantenan for di nos Status Aparte. Politiconan tradicional ta papia bunita di defende e autonomia di nos pais y cosecha asina aplauso di e votador, pero e tabata un medio pa enriquece nan mes. Pesei mi a conclui na ocasion di 60 aña di Statuut den e revista digital Universidad di Pueblo:

“Ta inculca un nacionalismo fanatico pa e pueblo defende e interes di e clase politico tradicional. Deliberadamente e elite politico di Aruba a manca tur instancia di control y pesei e solucion no por ta den man di e elite politico aki si juist e ta parti di e problema. E elite politico di su banda ta wordo maneha pa e mafia internacional, cu ta controla facilmente e micro-estado pa traficacion di droga y labamento di placa. Pesei awo na 2014, 60 aña despues di Statuut, mi ta di acuerdo cu e solucion ta den man di Hulanda pa pone ordo den nos mesun asuntonan. E ta un violacion di e principio di autonomia di e pais, pero tambe bo por wak e cu e ciudadano lo haya mas autonomia, pasobra dor di tanto medida pa via di mal maneho financiero y mal gobernacion e ciudadano cada bez ta bira mas dependiente di limosna di su gobernantenan y pues ta birando menos autonomo si e keda bao di e yugo di e clase politico tradicional.”

Mi ta apoya e decision di Gobierno di Reino pa implementa un Cft permanente pa Aruba y pone asina tanto gobierno como parlamento bao di curatela. E KB cu Gabinete Eman a haya, e noticia mas importante den 2014, ta bisa bon cla cu ni gobierno ni parlamento ya tin autoridad moral. Nan mester wordo poni bao curatela. E pueblo mes ta sinti cu e a wordo engaña, pero laga nos recorda e palabranan sabio aki di di e filosofo Kierkegaard (1831-1855): “tin dos manera di wordo engaña. Un ta di kere loke no ta berdad y e otro ta di nenga di kere loke ta berdad”. Y esei a pasa cu nos pueblo, e a nenga di kere loke ta berdad, pero e ora di berdad a yega den 2014. Ata e Cft, ata e KB, y no por nenga mas cu for di 1986 tabata tin mal maneho financiero y mal gobernacion, of manera e presidente di Cft cu razon a bisa cu Aruba ta cinco biaha pio cu Corsow. Anto na 1986 nos a sali for di e yugo di Corsow pa ta miho y awe na 2014 nos ta cinco biaha pio cu Corsow dor di mal maneho di nos gobernantenan for di 1986.

Mi ta desea for di exterior e pueblo di Aruba pa den e e dianan special aki di fin di aña pa reflexiona y acepta e berdad. Na votadornan di ikkiesvooreerlijk.eu y na simpatizantenan di Red Democratico mi palabra di gratitud pa boso apoyo den 2014. Bon Pasco y un Feliz 2015 pa un y tur!

Expresionnan haci den e articulo aki no necesariamente ta refleha opinion di ArenaPoliti.co