STA CRUZ -- MEP a tene su acostumbrado Partijraad dialuna anochi na Cede di MEP. Asistencia tabata grandi y na final di e reunion e candidatonan y presidentenan a confirma nan sosten incondicional na lider di MEP.

"Den Partijraad nos a trata diferente punto, principalmente relaciona cu e amienda # 7. Manera mi a declara caba e hecho cu nos no tabata tin tempo pa comunica cu nos sostenedornan durante reunion siman pasa diahuebs, a causa hopi confusion. Awor nos ta aclareando e confusion ey. Ora mi candidatonan, presidentenan y ami cana den hendenan, nos ta ripara cu ainda tin confusion.

Hopi hende ta kere cu ta e amienda di Desiree Croes a wordo aproba pero esey no ta corecto. Desiree Croes a trek in su amiendanan cu tabata number 1 y 2. Despues e 4 lidernan di fraccion a traha un otro amienda, # 7 den cual ta mantene matrimonio pa homber y muher y mes momento duna derecho igual na un grupo cu no tin derecho actualmente.

Tin hende ta kere ainda cu ta matrimonio di persona di mesun sexo a wordo aproba. Esey no ta corecto. Es mas, cu e amienda aki matrimonio ta keda entre homber y muher.

Ta importante pa duna mas informacion y asina kita e confusion cu tin den comunidad riba e tema aki. Esey e miembronan di Partijraad tambe ta sinti, cu nos mester informa nos militancia mas.
Mes momento ta hopi hende awor ta considera MEP como un alternativa real mirando con nos a para duro pa e ser humano, apesar di tur e critica. Cu nos ta para pa nos principionan social democrata, cu cual Betico Croes a funda nos partido, sin compromete nos principionan y nos conviccion.

Nos tin un caminda ainda pa cana nos dilanti pa comunica cu nos sostenedornan. Y manera mi a bisa, si ta tuma mi 100.000 ora pa papia cu 100.000 hende, mi ta hasi'e. Na fin di dia, nos a hasi lo corecto y mas y mas hende ta reconose esey. Contrario na Mike Eman y partido AVP, MEP a demostra cu na momento di realmente pone e ser humano central, no ta importante si bo ta bira popular. Nos semper ta pone e ser humano central" Lider di MEP a duna di conose.

E ambiente na Cede di MEP tabata uno ameno y di hermandad. Por nota cu partido MEP ta saliendo mas fuerte di e experiencia aki y cu e sosten na lider di MEP ta 100%.

Expresionnan haci den e articulo aki no necesariamente ta refleha opinion di ArenaPoliti.co