Lider di MEP Evelyn Wever-Croes a wordo apunta pa henter e parlamento di Aruba, pa representa Aruba den e comision di integridad di Reino Hulandes. Hunto cu representantenan di Hulanda, Corsou y Sint Maarten, sra. Wever-Croes lo traha riba puntonan di maneho y proposición di cambionan di ley.

Meta di e comision ta pa inventarisa di cada pais e leynan y maneho riba e tema aki, y con partidonan politico ta atende cu integridad dentro di e partido. Locual Parlamento di Aruba ta desea concretamente ta pa tin palabracionnan y reglanan clan a kiko cada pais mester atene nan mes, pa evita di wordo confronta cu sorpresa den futuro. Miembronan di e comision di Integridad di Reino a reuni diaranson ultimo, y a hasi palabracion di e trabounan cu mester wordo ehecuta pa asina presenta nan proposicionnan durante e siguiente reunion di IPKO na juni di e anja aki.

“Mi ta hopi honra cu e hecho cu Parlamento di Aruba a pone e confiansa den mi persona pa representa henter Parlamento den e comision importante aki, y lo mi hasi mi maximo esfuerzo pa nos yega na reglanan y leynan necesario pa garantisa integridad den gobernacion na Aruba tambe. Nos pueblo merece un gobierno integro, y lo mi duna tur di mi parti pa logra esaki”, segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co