Perspectiva Independiente without background 001

Evelyn Wever-Croes (MEP): Abo kier mira cambio den parlamento?

FraccionMEP19 AUDIO
BAN CABA CU E STEMPEL PARLEMENT! 

STA CRUZ – “Unda cu bo bai den comunidad, hendenan ta critica e stempelparlement cu nos tin awendia na Aruba. Un parlamento cu ta laga gobierno hasi y deshasi; un Parlamento cu no ta exigi respet; un presidente di Parlamento cu en bes di exigi respet pa e instituto mas halto constitucional, ta hiba atakenan infantil contra politiconan cu e no ta gusta; un Parlamento cu no tin respet pa opinion ni minoria, di oposicion, ni di pueblo. Un Parlamento cu a bira burachi di poder y a desconecta di pueblo. Tur esaki debi na e actitud dictatorial di gobierno di AVP cu ta impone riba Parlamento, y e fraccion di AVP cu ta permiti esaki pasa”, segun lider di MEP Evelyn Wever-Croes. 

Hecho ta cu  actualmente ta gobierno ta manda riba parlamento y e mayoria den parlamento no ta hasi nada pa frena esaki. Reunionnan ta wordo yama solamente ora gobierno pidi. Ora oposicion pidi reunion, nan no ta wordo yama. Reunionnan ta wordo yama apesar cu gobierno no a duna parlamento documento ni informacion, y ni cuanto fraccion di MEP den oposicion pidi, no ta haya documento. E ultimo ehempel tabata di e cuentanan anual di e fondo di turismo: sin cu e fondo a duna cuenta pa mas di 5 anja, toch e fraccion di AVP y PDR a aproba e presupuesto. E parlamentarionan aki a demostra cu ya nan no ta interesa den carga responsabilidad mas di controla gobierno. 

Locual ta mas lamentable ta cu e mayoria den Parlamento no ta permiti Parlamento ehecuta su trabou manera debe ser. E mayoria di AVP, cu e presidente di parlamento na cabes, ta stroba henter e parlamento di realmente controla gobierno. Parlamento cu mester ta e instituto cu ta salbaguardia nos democracia, ta esun cu ta trapa e principionan democratico constantemente. 

ABO KIER CABA CU E STEMPELPARLEMENT?
Aruba mester di un cambio den e sistema actual. Pa nos Parlamento por funciona debidamente, nos mester kibra e tradicion actual y cambia e leynan existente.
Politiconan cu mas voto mester tin prioridad pa drenta Parlamento, pasobra e ora nan tin mas autoridad riba e gobierno y por controla e gobierno. Tambe mester evalua si mester eligi Parlamento separa di e eleccion di minister president y gobierno. Tin mas alternativo, cu nos ventaha y desventahanan. Nos ta den proceso di evalua tur alternativa, pa trese un solucion pa e problema di “stempel parlement”, pasobra nos pueblo ta anhela pa un biento fresco, pa un cambio, pa democracia wordo realmente sirbi. Nos cuidadanonan kier por biba trankil sabiendo cu nan representantenan den Parlamento ta salbaguardia nan interesnan. Pa logra esaki nos mester trese bek ORDEN y RESPET pa nos Parlamento y Parlamento mester exigi e respet ey. Pa Parlamento funciona separa di gobierno, nos mester trese cambio den nos leynan y kibra cu e tradicionnan. Ta solamente cu e cambionan asina, nos lo soluciona e problema. Si abo tambe kier e cambio aki, uni na e #CambioReal2017 pa duna pueblo e poder democratico bek”, lider di MEP a declara.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.