Parlamento a debati e siman aki riba e tema di inseguridad y criminalidad. Na e ocasion aki lider di MEP Evelyn Wever-Croes tabata hopi critico riba e minister di husticia, Dowers, pero tambe riba prome minister Mike Eman.
“Nos tur mester admiti cu manera cos ta bayendo no ta bon, cu e maneho di  husticia bow di gabinete Mike Eman a faya barbaramente.  Hopi hende ta bisa cu Minister di Husiticia mester tene honor na su mes y baha for di e puesto. Ami mes no ta comparti e opinion ey completamente, pasobra e minister di husticia a laga sa cu e no ta haya placa suficiente den presupuesto pa por hasi su trabou. Pesey ami ta tene minister presidente responsabel, pasobra pa por combati criminalidad di berdad, mester di inversionnan substancial den husticia.
Aruba ta manera un barco sin rumbo, manera un barco sin capitan. Pasobra e capitan a bula bandona e barco na juni ora Hulanda a interveni. E capitan a bula for di e barco, ela bai den welga di hamber, y desde e tempo ey e tin di core go-kart regularmente como terapia mental pa keda focussed. Pero focussed riba kiko? Talves riba e 24 medidanan cu ela priminti Hulanda cu e ta bai tuma? 24 medida cu e rapport di CFT ta menciona riba pagina 4 y despues di 7 te cu 12?” Lider di MEP a bisa.

PREOCUPACION DI MEP
“Nos ta preocupa. Gabinete Mike Eman a redobla nos debe nacional, desempleo segun nos encuestanan ta yegando 15%, miles di famia ta biba na margen di pobresa, y nos economia ta stagna. Tur esaki ta bai causa MAS criminalidad, pasobra un tata di famia cu perde trabou, cu no por haya trabou ningun caminda, por pensa di comete un crimen contal e pone cuminda riba mesa pa su yiunan. Pues mirando e situacion caotico cu gabinete Mike Eman tin nos pais aden, nos ta teme cu e presion riba husticia lo bira mucho mas fuerte.
Esaki ta sin tene na cuenta cu Gabinete Mike Eman a priminti CFT y a priminti Hulanda cu lo introdusi 24 medida nobo, cual lo causa un aumento di belasting di 10%,  manera nos ta lesa riba pag 3 y 4 di e rapport di CFT.

ARUBA MERECE MIHOR
Nos kier mira nos pais mas sigur, pa asina nos grandinan por keda cas trankil ora nan famia bai traha, y no wordo mara, bati y atraca. Nos kier mira rond di nos scolnan bon vigila pa nos yiunan por bai scol trankil of bai cinema y gosa di nan infancia y hubentud. Nos kier pa ora cu nos caba di pasa den e desastre financiero aki, cu nos pueblo tambe sali ileso di esaki.
CFT ta bisa riba pagina 2 di e rapport cu lo tarda 20 anja pa nos recupera di e 5 anjanan di desastre di Mike Eman. Locual nos mester evita ta cu aki 20 anja, e operacion tabata exitoso, y finanzas ta na orden, pero e pacient a muri, e pueblo mes no a sobrebibi.
ARUBA MERECE MIHOR, Aruba merece un gobierno cu realmente ta lucha pa hasi nos pais mas sigur, y esey ta nos compromiso cu pueblo di Aruba” Evelyn Wever-Croes a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co